Qashyqtan oqytý: Almatyda ınternet jyldamdyǵy arttyryldy
ALMATY. QazAqparat - Almaty ákiminiń orynbasary Erjan Babaqumarov qalalyq Bilim basqarmasynyń basshysy Lázzat Jylqybaeva jáne Tsıfrlandyrý basqarmasynyń basshysy Baıan Qońyrbaevpen birge aýdandar basshylyǵymen oqý jylyna daıyndyqqa qatysty jınalys ótkizdi.
Talqylanǵan birinshi másele – oqýshylar men pedagogtardy qashyqtan oqý barysynda sapaly jáne joǵary jyldamdyqty ınternetpen qamtamasyz etý boldy.
«Buǵan deıin júrgizilgen saraptama jáne tehnıkalyq dıagnostıkalaý qorytyndysy boıynsha ınternet jáne uıaly baılanys ótkizgishtigi tómen 169 oryn anyqtalǵan bolatyn. Búgingi tańda 141 núkte boıynsha jumystar aıaqtaldy, qalǵandary boıynsha jumys jalǵasýda. Sonymen birge, qańtar aıynan búgingi kúnge deıin mobıldi baılanys operatorlary Almaty qalasy boıynsha osyǵan deıin bolǵan bazalyq stantsııalar negizinde 164 núkte jańartyldy.
Osylaısha, qabyldanǵan sharalar qashyqtan oqytýdy sapaly jáne irkilissiz qamtamasyz etýge qajetti sıgnal jyldamdyǵyn arttyrdy.
Sonymen birge, ınternetke qosylýǵa muqtaj 22 myńnan astam oqýshyǵa SIM-kartalar jáne roýterlar satyp alyndy», - delingen Óńirlik kommýnıkatsııalar qyzmeti taratqan aqparatta.
Budan bólek, jınalys barysynda aýdan ákimdikteriniń baıandamalary tyńdaldy.
Búgin Almatyda balalardy1-synypqa qabyldaý aıaqtaldy. Bıyl 27 myń oqýshy 1-synypqa barady. Pandemııa jaǵdaıynda oqý qashyqtan uıymdastyrylady. 1-2 synyp oqýshylary úshin kezekshi toptar jumys isteıdi. Qashyqtan oqytýǵa tehnıkalyq daıyndyqty qamtamasyz etý úshin 75 myńnan asa bala jáne 2,2 myń mektep muǵalimi kompıýterlermen qamtamasyz etiledi. Búgingi tańda tehnıkanyń biraz bóligi berildi, qalǵan kompıýterlik quraldar 15 qyrkúıekke deıin tapsyrylady. Tıisti túsindirý jumystary aýdan ákimdikteri jelisi boıynsha júrgizilýde.
Onymen qosa, oqýshylardy oqý materıaldarymen 100% qamtamasyz etý boıynsha jumystar júrgizilýde.Qashyqtan oqytýǵa jumyldyrylǵan muǵalimder quramy Bilimland.kz, Opiq.kz, Kundelik.kz, Microsoft.Teams sııaqty tsıfrly saýattylyqtyń tıisti kýrstarynan ótti.
Almaty ákiminiń orynbasary Erjan Babaqumarov barlyq sanıtarlyq-epıdemıologııalyq talaptardyń qatań saqtalýynyń mańyzdylyǵyna erekshe nazar aýdardy. Jekeleı alǵanda, oqýshylar aǵynyn baǵyttaý algorıtmi, kezekshi toptar úshin qońyraýdyń dıfferentsıaldy kestesi, sanıtaızerlermen jáne dezınfektsııalyq quraldarmen qamtamasyz etý, maska rejıminiń saqtalýyn baqylaý, dezınfektsııalyq óńdeý, aýany jeldetý jáne ózge máseleler kóterildi.
E. Babaqumarov aýdandyq bilim bólimderi jáne bilim berý mekemeleriniń birinshi basshylaryna balalar men muǵalimderdiń qaýipsizdigin qamtamasyz etýde árqaısysyna jeke jaýapkershilik júkteletinin eske saldy.
Aıta keteıik, qalalyq Bilim basqarmasynyń jelisi boıynsha call-ortalyqtar qyzmet etedi:
- Alataý aýdany 8 702 671 9650;
- Almaly aýdany – 8 707 930 2005;
- Áýezov aýdany – 8 701 991 4875;
- Bostandyq aýdany – 8 702 459 0906;
- Medeý aýdany – 8 701 783 9483;
- Naýryzbaı aýdany – 8 777 827 0580;
- Jetisý aýdany– 8 707 296 5560;
- Túrksib – 8 701 352 4873.
Sonymen birge, Orta bilim berý (mektepter) bóliminiń - 8 775 908 5598, tehnıkalyq jáne kásibı bilim berý bóliminiń (kolledjder) - 8 707 549 5495 call-ortalyqtary jumys isteıdi. Internattyq mekemelerdiń máseleleri boıynsha 8 747 878 8283 nómirine habarlasýǵa bolady.
