Qashyqtan oqý: SQO-da ata-analar úshin onlaın-kýrstar ótedi
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov brıfıng ótkizip, bilim berý mekemeleriniń jańa oqý jylyna daıyndyǵy jóninde aıtty, dep habarlaıdy «QazAqparat» HAA tilshisi.
SQO ákiminiń aıtýynsha, óńir jańa oqý jylyna ázir. Kadr tapshylyǵy máselesi tolyq sheshildi. Sońǵy úsh jylda óńirge 1 390 jas muǵalim keldi. Bıyl taǵy 315 jas maman jumysqa alynbaq.
Óńirde búginde 25 kolledj bar. 3 kolledj qashyqtan jumys istese, 12-si aralas oqytý júıesine kóshedi. Al aýyldardaǵy 10 arnaıy oqý orny shtattyq rejımde jumys istemek.
Qosymsha bilim berý uıymdarynda oqý qashyqtan uıymdastyrylady. Sondaı-aq shtattyq rejımde 5 adamǵa deıingi shaǵyn toptarda jeke sabaqtar ótkizýge ruqsat etildi. Al arnaıy bilim berý uıymdarynda balalarǵa keńes berý onlaın rejımde ótedi. Balalar sabaqqa aldyn ala jazylady. Tek kúrdeli balalar ǵana jeke qabyldanady.
«Qashyqtan oqytý formaty - bul balalar úshin ǵana emes, muǵalimderge de úlken syn. Pedagogter úshin «Qashyqtan oqımyn» onlaın-kýrsy ázirlendi. Qazirdiń ózinde 3 myńǵa jýyq muǵalim daıarlyqtan ótti. Oqý jyly bastalǵanǵa deıin taǵy 10 myń adam oqıdy. Sondaı-aq, ata-analarǵa arnalǵan onlaın-kýrstar ótkiziledi», - deıdi Qumar Aqsaqalov.
Tehnıkalyq qoldaý kórsetý úshin 20 tamyzdan bastap aýdandar men Petropavl qalasynda 15 call-ortalyq jumysyn bastaıdy.
«Jańa oqý jyly qarsańynda ata-analarǵa úlken ótinish bar. Oqýshylarǵa úıde oqý ońaı emes. Balalaryńyzdyń sabaǵyna kóńil bólińiz. Tehnıkamen jumys isteýge kómektesińiz. Búldirshinderdiń tárbıesine jáne oqýyna jaýapkershilikpen qaraýdy suraımyn», - dedi óńir basshysy.
