Qashyqtan oqý: Qostanaı oblysynda kompıýter alýǵa 1,4 mlrd teńge bólindi
Búginde aımaqtaǵy 493 mekteptiń 336-sy shtattyq rejımde jumys isteıdi. Munda 22 myń oqýshy bilim alady. Al 88 myń oqýshysy bar 157 mektep qashyqtan oqytý formatyna kóshti.
«Bastaýysh synyptarda ata-analardyń ótinishi boıynsha tolymdylyǵy 15 adamǵa deıingi kezekshi synyptar jumys isteıdi. Onda qatań sanıtarlyq sharalar saqtalǵan. Ǵımarattyń kireberisinde jáne shyǵar jaǵynda kún saıyn medıtsına qyzmetkerleri jumys isteıdi. Pedagogtar men oqýshylar úshin termometr qoıylǵan, olar kúnde tańerteń gıgıenalyq fıltrden ótedi. Oqýdy shtattyq rejımde uıymdastyrý úshin mamyr aıynda oblystyq bıýdjet qarajatynan bilim berý uıymdaryna jeke qorǵanysh jáne dezınfektsııalaý quraldaryn satyp alý úshin 30,5 mln teńge bólindi. Oblystyq máslıhattyń sessııasynda qosymsha dezınfektsııalaý quraldaryn satyp alýǵa 206,5 mln teńge mólsherinde qarajat qarastyryldy», - deıdi basqarma basshysy.
Qashyqtan oqytý formatynda muǵalimder men oqýshylardy kompıýtermen qamtamasyz etýge erekshe kóńil bólingen. Jazǵy kezeńde jergilikti bıýdjetten 1,4 mlrd teńgege 6 myń kompıýter satyp alyndy. Buǵan qosa úkimettik rezervten qarajat bólinip, oblysqa 1584 kompıýter jetkizildi, olar oblystyń 8 óńirine taratyldy.
«2020 jyly mektepke deıingi jáne orta bilim berý uıymdaryna beınebaqylaý kameralaryn ornatý úshin 187,2 mln teńge baǵyttaldy. Jyl sońyna deıin oblys mektepterinde jyly dárethanalardyń bolýy máselesi de tolyq sheshiletin bolady. Amangeldi aýdanynyń 11 mektebinde jáne Jangeldın aýdanynyń 3 mektebinde jyly dárethanalar ornatylmaǵan. Olardy ishki sanıtarlyq toraptarmen jabdyqtaý úshin oblystyq bıýdjetten 23,9 mln teńge bólindi», - dep atap ótti Záýre Báımenova.
