Qashyqtan bilim berý: Muǵalim mektepke kelýge mindetti me

NUR-SULTAN. QazAqparat – Qashyqtan bilim beretin muǵalimdi mektepke kelýge qystaý - durys emes. Bul týraly QR Bilim jáne ǵylym vıtse-mınıstri Sholpan Karınova aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda BAQ ókilderi vıtse-mınıstrden Almaty men Shymkent qalalarynyń keıbir mektepterinde sabaqty onlaın ótkizetin muǵalimderge tańerteń saǵat 9.00-de jáne keshki saǵat 17.00-de mektepke kelip belgilený mindettelgeni týraly aqparat baryn aıtyp, munyń qanshalyqty oryndy ekendigin surady.

«Almaty men Shymkent qalalarynda mundaı faktiler oryn alsa, onda biz olardy jeke-jeke qarastyramyz. Jalpy, mınıstrlik oqý protsesine qatysty naqty ádistemelik ustanymdardy barlyq bilim mekemelerine jetkizgen bolatyn. Soǵan baılanysty muǵalimder qazirgi sanıtarlyq-epıdemıologııalyq ahýaldy eskerip, óz qalaýymen sabaqty mektepke kelip júrgizýine de, úıde de júrgizýine bolady. Barlyq mektepte ınternet jelisi jaqsy qalyptasqan. Kompıýterler de jetkilikti. Keıbir muǵalimder sabaǵyn mektepke kelip ótkizsem deıdi. Bul, muǵalimniń burynnan úırengen dástúrli formaty», - dedi vıtse-mınıstr baspasóz máslıhatynda.

Onyń aıtýynsha, qashyqtan sabaqty mektepte ótkizýdi qalaǵan ustazǵa bilim mekemesiniń ákimshiligi qajetti barlyq jaǵdaıdy jasap berýge mindetti.

«Al ákimshilik tarapynan muǵalimdi mektepke kelýge qystaý - durys emes. Muǵalimder óz tańdaýymen jumys isteýi tıis», - dedi Sholpan Karınova.