Qashpaǵan qashardyń sary ýyzy - baspasózge sholý
***
Oral óńirindegi marqa qozynyń etin óńdeý jobasy bastalǵan. Ońtústik Qazaqstan oblysynyń Arys aýdanyndaǵy «Qostúıin» JShS-niń dırektory Saǵynbek Jolbaryshan «Egemen Qazaqstan» gazetine jańa joba týraly mol aqparat bergen eken. «Bul joba 2 mıllıard 600 myń teńgege baǵalanǵan. Osy qomaqty qarajattyń 85 paıyzy «QazAgroQarjy» AQ-tan bólinse, 15 paıyzy joba quryltaıshylarynyń óz qarajaty bolyp tabylady. Qazir sol qarajattyń qaıtarymy qaıda? Marqa etin óńdeý jobasy 2013 jyly bastalyp, 2014 jyldyń aıaǵynda aıaqtalǵan. 2015 jyldyń basynda paıdalanýǵa berilgen. Sodan beri bir jyl jeti aı ýaqyt ótkenin eseptep shyǵarý qıyn emes. Árıne, osy merzim aralyǵynda birde-bir bas marqa qozynyń eti óńdelmedi desek shyndyqqa qııanat bolar. Qazirgi qolda bar derekter «Batys Marqa Lamb» iske qosylǵannan keıin 25 tonna qozy etin óńdegenin kórsetedi. Paıyzdyq kórsetkishke shaqqanda bul múldem joqqa tán kórsetkish ekeni de anyq. Al bıylǵy mólsher tórt myń tonna tórt júz kılogramdy quraıdy»,-dep jazady basylym. Bul týraly tolyǵyraq gazettiń búgingi sanynda jaryq kórgen «Qashpaǵan qashardyń sary ýyzy» atty maqaladan oqı alasyzdar.
Sondaı-aq, basylymnyń habarlaýynsha, Shyǵys Qazaqstan oblysy, Óskemen qalasynyń qoǵamdyq jolaýshylar tasymaldaýshylary ózderiniń avtobýs parkterin jańartýdy qolǵa aldy. «Búginde «Rost» JShS 8, «VoSca» JShS 4 avtobýs satyp aldy. Qala kóshelerinde qyzmet kórsetýge daıyn turǵan sý jańa kólikterdi aımaq basshysy Danıal Ahmetov qarap shyǵyp, bastalǵan jumysqa oń baǵa berdi»,-dep habarlaıdy gazet. Atap aıtqanda, «Rost» JShS Semeı qalasynda shyǵarylatyn «Daewoo» markaly jalpy syıymdylyǵy 60 oryndyq segiz avtobýs satyp alǵan eken. Bul jóninde tolyǵyraq «Avtobýstar Semeıden qurastyrylyp, Óskemende júıtkıdi» atty maqaladan oqı alasyzdar.
***
«Kazahstanskaıa pravda» gazeti Qazaqstan Respýblıkasynyń bokstan ulttyq qurama jattyqtyrýshysy Myrzaǵalı Aıtjanovpen dúbirli doda aldynda ekslıýzıvti suhbat uıymdastyrǵan eken. London Olımpıadasyna da boksshylar aparǵan Aıtjanov qatarynan ekinshi Olımpıadaǵa sportshylar daıyndaý ońaı bolmaǵanyn aıtyp otyr. «Qatarynan ekinshi tsıkl boıy boksshylardy bir qalypta ustaý qıyn. Bokstyń ózi qarqyndy damyp jatyr, qarsylastarymyz da bir orynda qarap otyrǵan joq. Biz óz ornymyzdy bermeı, kerisinshe, alǵa jyljý úshin kóp ter tóktik»,-deıdi M.Aıtjanov. «Kazahstanskaıa pravda» gazetiniń búgingi sanyndaǵy «V Rıo my edım pobejdat» atty suhbattan osy jaıly tolyq oqı alasyzdar.
***
«Ekspress K» gazeti psıhologpen áńgimelese otyryp, áleýmettik jelidegi belsendi adamdardyń ómirine zertteý júrgizgen. Psıhologtyń aıtýynsha, áleýmettik jelige kúnde sýret júktep, ár basqan qadamyn aıtyp otyrǵan adamnyń shyn máninde ózine degen senimdiligi joq, ózin tómen baǵalaıtyn adam eken. «Adamdar tipti jeke muraǵatynda ózinen basqa eshkimge kórsetpeýge bolatyn sýretter men vıdeolar júkteıdi. Ondaı sýretterdi tipti qorqynyshty tús sııaqty umytyp ketken durys. Biraq, ony da unatyp, «laık» basatyn adamdar tabylady. Osylaısha, adam jelidegi «laıkka» táýeldi bola bastaıdy»,-dep jazady basylym. Bul týraly maqala «Skolko «laıkov» stoıt vasha jızn?» taqyrybynda berilip otyr.
