Kashmırdegi taý jynysy syrǵymasynan 62 adam qaza tapty
KAShMIR. QazAqparat – Kashmırde sońǵy úsh kún ishinde bolǵan tas pen topyraq syrǵymasy men kóshkin saldarynan 62 adam qaza taýyp, kóptegen adam iz-túzsiz joǵalyp ketti, dep habarlaıdy QazAqparat VVS-ge silteme jasap.
Ásirese, Nılým alqaby qatty zardap shekti (eki jaǵyn taý qorshaǵan 130 shaqyrymdyq aı pishindes jińishke alqap). Bul óńirde tabıǵı apat jıi bolyp turady, degenmen osy jolǵy apat tarıhtaǵy eń aýqymdysy bolyp otyr.
Pákistannyń basqa da bóligindegi ondaǵan adam, Úndistan men Aýǵanstan halqy qolaısyz aýa raıynyń qurbany boldy.
Kashmır qatty zardap shekken aýdandardyń biri: 62 adam qaza taýyp, birneshe adam iz-túzsiz joǵalyp ketti, delingen Pákistan ulttyq tabıǵı apatqa qarsy kúres basqarmasynyń habarlamasynda.
Pákistannyń Belýjıstan provıntsııasynda, resmı málimetterge sáıkes, 20 adam qaza tapty, sonyń ishinde 12 áıel jáne 7 bala bar.
Jergilikti BAQ-tyń deregi boıynsha, Úndistanda segiz adam mert bolǵan.
Resmı málimetterge sáıkes, Aýǵanstanda sońǵy eki apta ishinde 24 adam qaza taýyp, 40 adam jaraqat alǵan. Qatty zaqymdalǵan provıntsııalarǵa Gılmend, Kandagar, Gerat jáne Kabýl kiredi. Munda qutqarý jumystary júrgizilýde.
Pákistan bıligi VVS-ge habarlaǵandaı, Nılým alabynda tas-topyraq kóshkini men syrǵymadan 59 adam qaza taýyp, 40 adam jaraqat alǵan. 100-den astam úı qıraǵan.
Polıtsııanyń málimetinshe, alapqa aparar joldardyń barlyǵy jabylyp qalǵan. Sondyqtan qutqarý komandalary onda bara almaı jatyr.
