Kashmırdegi sý tasqyny men kóshkinnen 11 adam qaza tapty
ASTANA. KAZINFORM – Úndistannyń Kashmır óńirinde nóser jaýyn saldarynan bolǵan sý tasqyny men jer kóshkini keminde 11 adamnyń ómirin qıdy. Taǵy jeti adam iz-túzsiz joǵalyp ketken, dep habarlaıdy Sınhýa.
Tabıǵı apat Srınagar qalasynyń ońtústik-batysynda ornalasqan Pýnch jáne Radjoýrı shekaralyq aýdandarynda boldy.
Jergilikti bıliktiń málimetinshe, tolassyz jaýǵan jańbyrdan keıin oıpatty aýmaqtardy sý basyp, júzdegen turǵyn qaýipsiz jerlerge kóshirildi.
– Ózenderdiń arnasynan tasýyna baılanysty ondaǵan kólikti sý aǵyzyp áketti nemese sý astynda qaldyrdy. Sonyń saldarynan óńirdiń ınfraqurylymyna aıtarlyqtaı zııan keldi, – dep habarlady jergilikti bılik.
Qazirgi ýaqytta qutqarý qyzmetteri joǵalǵan adamdardy izdestirý jáne oqshaýlanyp qalǵan turǵyndardy qaýipsiz aımaqtarǵa evakýatsııalaý jumystaryn júrgizip jatyr. Bul jumystar tolassyz jaýǵan jańbyr men zaqymdanǵan joldarǵa baılanysty kúrdelene túsken.
Sınoptıkterdiń boljamynsha, óńirde nóser jaýyn 23 shildege deıin jalǵasady.
Aıta keteıik, buǵan deıin Úndistanda mýssondyq jaýyn-shashyn saldarynan 13 adamnyń qaza tapqany habarlanǵan bolatyn.
