Kashmırdegi qarýly shabýyl: Úndistan shuǵyl áreketke kóshti

ASTANA. KAZINFORM – Úndistan basqaratyn Kashmırdegi tanymal týrıstik ortalyqta qarýly adamdar toby 26 adamdy óltirgennen keıin Úndistan Pákistanǵa qarsy sharalardy jarııalady, dep habarlaıdy VVS.

Qabyldanǵan sharalar qataryna eki el arasyndaǵy negizgi shekara ótkelin jabý, sýdy bólisý týraly kelisimdi toqtatý, dıplomattardy shyǵarý jáne keıbir pákistandyqtardyń elden 48 saǵat ishinde ketýin talap etý kirdi.

Óziniń shabýylǵa qatysy joq dep sanaıtyn Pákistan bıligi beısenbi kúni jaýap berý úshin kezdesý ótkizedi, dep málimdedi Pákistan syrtqy ister mınıstri.

Pahalgamdaǵy shabýyl  sońǵy ýaqyttaǵy aımaqtaǵy eń qandy oqıǵalardyń biri boldy jáne onsyz da shıelenisken ekijaqty qarym-qatynasty odan ári qıyndata túsýi múmkin.

Úndistan úkimeti bul shabýylǵa qatań jaýap berip, jaýapkershilikti janama túrde Pákistanǵa júktep otyr.

- Bul jantúrshigerlik árekettiń artynda turǵandar jazalanady. Lańkestikpen kúresýdegi bizdiń sheshimimiz aınymaıdy jáne odan ári kúsheıe túsedi – dedi Úndistan premer-mınıstri Narendra Modı H áleýmettik jelisindegi jazbasynda.

Úndistan sondaı-aq ondaǵan jyldar boıy shıeleniske tótep bere alǵan 1960 jylǵy Ind sýlary týraly kelisimdi toqtatatynyn málimdedi.

Úndistan qaýipsizdik qyzmetteriniń málimetinshe, shabýyldyń artynda «Kashmır qarsylasýy» dep atalatyn top tur.

Sársenbi kúni keshke shabýyldaýshylardy izdeý jalǵasty. Pákistan úkimeti Ulttyq qaýipsizdik keńesiniń otyrysy beısenbi kúni ótetinin habarlady.

Pahalgamdaǵy shabýyldan keıin Pákistan Syrtqy ister mınıstrligi týrısterdiń ólimine alańdaýshylyq bildirip, kóńil aıtty.

Sondaı-aq Úndistan tarapynan sársenbi kúni qolǵa alynǵan sharalarǵa sáıkes, Delı elishiligindegi pákistandyq ásker keńesshilerge shuǵyl túrde elden ketý buıyryldy, kelesi aptada taǵy dıplomattardy elden shyǵarý josparlanyp otyr.

Buǵan deıin Kashmırdiń Úndistan bóliginde qarýly adamdar týrıster tobyna oq jaýdyrǵan. Polıtsııanyń málimetinshe, 26 adam qaza taýyp, 17 adam jaraqat aldy, dep habarlaıdy VVS. 

Úndilik baspasózdiń habarlaýynsha, qaza bolǵandardyń ekeýi Nepal jáne BAÁ azamattary, taǵy ekeýi – jergilikti turǵyndar, qalǵandary Úndistannyń basqa aımaqtarynan kelgen týrıster edi.

Atys bolǵan Pahalgam – týrıster úshin tanymal oryn. Ol Úndistan men Pákistan talasyp otyrǵan daýly aýmaq, Úndistannyń baqylaýynda. Ondaǵy halyq negizinen musylmandar.

Buǵan deıin Qazaqstan Prezıdenti Úndistan Premer-mınıstrine kóńil aıtqanyn jazǵan bolatynbyz.

Prezıdent halyqqa qarsy jasalǵan bul zorlyq-zombylyqty qatań aıyptaıtynyn jetkizip, zardap shekken azamattardyń tezirek saýyǵyp ketýine tilektestigin bildirdi.