Kashmırde úndistandyqtardyń oǵynan bes adam mert boldy

ASTANA. KAZINFORM – Úndistan men Pákistannyń qarýly kúshteriniń demarkatsııa syzyǵy boıynda bolǵan atysynyń saldarynan Kashmırdiń pákistandyq bóliginde 10 adam zardap shegip, keminde 5 adam mert boldy.

Bul týraly reseılik TASS Geo TV telearnasyna silteme jasap habarlady.

Telearna taratqan málimetterge qaraǵanda, Pákistan men Úndistannyń qarýly kúshteri baqylaý syzyǵynyń boıyndaǵy birneshe bekette túni boıy atysqan. Materıalda úndistandyqtar tarapynan atylǵan oqtyń azamattyq aýdandarǵa baǵyttalǵany aıtylady.

Buǵan deıin Úndistan áskeri 9 mamyrǵa qaraǵan túni Pákistanmen arada kóptegen qaqtyǵystar bolǵanyn habarlaǵan edi.

Úndistan armııasynyń habarlaýynsha, Pákistan respýblıkaǵa drondar men ózge de qarýdy qoldana otyryp shabýyldaǵan. Soqqylardyń beti qaıtaryldy. Beıresmı derekter boıynsha, áýe qorǵanys júıesi 50-ge jýyq pákistandyq drondy qaǵyp túsirgen.

Osyǵan deıin EO Úndistan men Pákistandy sabyr saqtaýǵa shaqyrǵany týraly jazǵan edik.