Kashmırde kóshkinnen qaza tapqandar sany 77-ge jetti
ISLAMABAD. QazAqparat - Pákistandaǵy kóshkin saldarynan keminde 77 adam qaza taýyp, 94 adam jaraqat aldy, dep habarlaıdy QazAqparat CNN-ge silteme jasap.
Jergilikti bılik ókilderiniń aıtýynsha, kóshkinniń paıda bolýyna Pákistannyń Kashmırindegi Nılým alqabynda qalyń qar jaýýy áser etken. Bılik ókilderine sensek, qaza tapqandardyń sany áli de artýy múmkin.
Pákistannyń premer mınıstri Imran Han tótenshe jaǵdaılar agenttiginen, áskerıler men federaldy mınıstrlikterden zardap shekken turǵyndarǵa gýmanıtarlyq kómek kórsetýdi suraǵanyn málimdedi.
Aıta ketý kerek, bıyl Pákistanda sońǵy jıyrma jyldaǵy eń qatty qys tústi. Kashmırde jaýǵan qar joldardy jaýyp, baılanys qyzmeti úzildi, sonymen qatar elektr energııasyn berý qyzmeti de nasharlady.
Eske sala keteıik, biz buǵan deıin Kashmırde sońǵy úsh kúndegi tas pen topyraq kóshkininen 62 adam qaza taýyp, kóp adam iz-túzsiz ketkenin jazǵan edik.
