Qashqar - álemdegi eń kóne shahar - fotoreportaj
QAShQAR. KAZINFORM - Qashqar – álemdegi eń tanymal kóne shahardyń biri. Eki myń jyldyq tarıhy bar qala Uly Jibek Jolynyń boıynda Shyńjań - Uıǵyr avtonomııasynda ornalasqan.
Ǵalym, etnograf, folklorshy, saıahatshy jáne aǵartýshy Shoqan Ýálıhanovtyń tabany tıgen ólkede Kazinform tilshisi de bolyp qaıtty.
Qashqar – Qytaıdyń batysynda, Pamır taýynyń eteginde ornalasqan. Shahar ekige bólingen: qazirgi jáne kóne.Ol uıǵyr halqynyń ejelgi mekeni. Oǵan myna eki myń jyldyq tarıhy bar kóne qala dálel.
Úlken qaqpadan kire salysymen basqa álemge tap bolǵandaı kúı keshesiń. Kóne ǵımarattar, tar kóshe, qyzyp jatqan saýda, teatrlandyrylǵan kórinis, kósh kerýeni, án men kúıge bólengen aspan. Osynyń bári ertegiler álemine uqsaıdy.
Mundaǵy erekshe atmosferany sózben aıtyp jetkizý múmkin emes. Kóne qalaǵa kúnine bir myń saıahatshy kirip shyǵady. Mundaǵy týrısterdiń basym bóligi ishki Qytaıdan.
Bul jerden zamanaýı qonaq úı kezdestirmedik. Jergilikti turǵyndardyń aıtýynsha, týrısterdi óz úılerinde kútip, qondyrady eken.
«Ózderińiz kórip turǵandaı baspanamyz óte kóne. Aǵashtan soǵylǵan úıimiz urpaqtan-urpaqqa mura bolyp qalǵan qundy jáne baǵa jetpes dúnıe dep sanaımyn. Jyl on eki aı úıimizden qonaq úzilmeıdi. Saıahattap kelgenderge as-sýymyzdy usynyp, qonaqjaılyq tanytamyz. Munda eshqandaı bes juldyzdy qonaq úı joq. Birneshe kúnge kelgenderge oryn tabylady. Negizinen týrısterdiń kópshiligi ishki Qytaıdan keledi. Kúni boıy aralap, keıin jańa aýdandaǵy qonaqúılerge ketedi. Qazir elde vızasyz rejım engizildi. Ózge memleketterden de saıahatshylar kele bastady»,-deıdi Mýhıche Muhamedqyzy.
Tarıhy tereńde kóne Qashqardyń ashylmaǵan syrlary men qupııasy áli de bar ekenin myna erekshe sáýletti ǵımarattardan-aq ańǵarýǵa bolady.
Aıta keteıik, bul ólkege qazaqtyń uly ǵalymy, etnograf, folklorshy, saıahatshy jáne aǵartýshy Shoqan Ýálıhanovtyń tabany tıgen.
