Qashyqtan jumys jáne jańa keste: Almaty ákimdigi joldaǵy keptelisti qalaı sheshpek

ALMATY. KAZINFORM — Almatyda jazǵy demalys bitip, jańa oqý jyly bastalǵanda kólik sany kóbeıedi. Qarbalas kezde joldaǵy keptelisti azaıtý úshin ákimdik birneshe sharany qolǵa aldy. Sonyń ishinde jumys ýaqytynyń kestesin ózgertý jáne keıbir qyzmetkerlerdi qashyqtan jumysqa kóshirý bar. 

Memlekettik qyzmetkerler úshin jańa keste

Qala ákiminiń sheshimimen memlekettik mekemelerdiń jumys kestesi ózgerdi. Endi keıbir qyzmetkerler jumysyn burynǵydaı 9:00–de emes, 8:30–da bastaıdy. Al túski úzilis 1 saǵattan 1,5 saǵatqa uzartyldy.

Sonymen qatar memlekettik qyzmetkerlerdiń bir bóligin qashyqtan jumys isteýge kóshirý josparlanyp otyr. Biraq zań boıynsha mundaı formatqa jalpy qyzmetkerlerdiń 30%-dan artyq bóligin ǵana jiberýge ruqsat etiledi.

Bıznes úshin

Ákimdik depýtattardyń bastamasyn qoldap, jeke kompanııalardyń keńse qyzmetkerlerin qashyqtan nemese ıkemdi jumys kestesine kóshirýdi qarastyrýdy usyndy. Alaıda qashyqtan jumysqa kóshý týraly túpkilikti sheshim jumys berýshilerdiń ózderine tıesili.

— Aýdan ákimderiniń apparattary kásipkerlerge 2-6 qyrkúıek aralyǵynda keńse qyzmetkerleriniń bir bóligin ıkemdi nemese qashyqtan jumys formatyna kóshirý múmkindigin qarastyrý jóninde hat joldady. Bul hattar tek usynys sıpatynda boldy, — dep naqtylady ákimdiktiń baspasóz qyzmeti.

Oqý oryndary úshin

Joldaǵy kólik tyǵyzdyǵyn azaıtý úshin joǵary oqý oryndary men kolledjderge sabaq ýaqytyn ártúrli qoıý usynyldy. Bir oqý orny sabaqtaryn 8:00–de bastasa, endi biri 10:00–de bastaıdy. Bul ádis 637 myńnan astam stýdenttiń qozǵalysyn teń bólip, tańǵy qarbalastaǵy keptelisti azaıtady.

Aıta keteıik, 15 qyrkúıekten bastap astanadaǵy keıbir uıymdar da jańa jumys kestesine kóshedi. Mundaı sheshim de keptelisti azaıtý úshin qabyldanǵan.