Qashyqtan jumys esepke alynbady: «Bolashaq» túlegin oqýǵa ketken shyǵyndy qaıtarýǵa mindettedi

ASTANA.KAZINFORM — Astananyń mamandandyrylǵan aýdanaralyq ákimshilik soty 2025 jylǵy 13 tamyzda Boston University túleginiń Ǵylym jáne joǵary bilim mınıstrligine «Bolashaq» halyqaralyq stıpendııasynan aıyrý týraly sheshimdi zańsyz dep taný jónindegi talabyn qanaǵattandyrýdan bas tartty. 

Іs materıaldaryna sáıkes, talapker 2013 jyly AQSh-ta magıstratýrada oqý úshin «Bolashaq» stıpendııasyn alǵan. Oqýdy jáne keıingi taǵylymdamany aıaqtaǵan soń ol eńbek qyzmetin bastaǵan, biraq ony Qazaqstan aýmaǵynan tys jerlerde, jekemenshik uıymdarda qashyqtan atqarǵan.

Sot anyqtaǵandaı, talapker stıpendııalyq sharttyń negizgi talabyn oryndamaǵan — belgilengen merzimde Qazaqstan aýmaǵyna oralmaǵan jáne el ishinde mamandyǵy boıynsha mindetti bes jyldyq jumysyn ótemegen. UQK Shekara qyzmeti talapkerdiń 2023 jylǵy 1 mamyrda Qazaqstannan shyqqanyn jáne sodan beri elge oralmaǵanyn rastady.

Jiberilgen habarlamalarǵa qaramastan, stıpendıat sharttyq mindettemelerin oryndaý úshin eshqandaı shara qabyldamaǵan. Osyǵan baılanysty Respýblıkalyq komıssııa ony stıpendııadan aıyrý jáne ketken shyǵyndy óteý mindetin júkteý týraly sheshim qabyldady.

Sot mınıstrliktiń áreketin zańdy dep tanyp, baǵdarlama sharttarynda qashyqtan jumys isteý arqyly ótem jasaý múmkindigi qarastyrylmaǵanyn atap ótti.

Aıta ketelik Ǵylym jáne joǵary bilim mınıstri Saıasat Nurbek «Bolashaq» baǵdarlamasyna engizilgen ózgeriske qatysty pikir aıtqan edi.