Qashan da qazaq halqyna rızashylyǵymdy umytpaımyn — Mońǵolııanyń halyq ártisi Sarantýıa

ASTANA. KAZINFORM — Silk Way Star baıqaýyn kóptegen memleketter óz elinde kórsetedi dep oılaımyn. Bul týraly osy joba qazylar alqasynyń múshesi, Mońǵolııanyń halyq ártisi Sarantýıa hanym aıtty.

— Bul joly Silk Way Star halyqaralyq jobasynyń qazylar alqasynyń múshesi retinde keldim. 1993 jyly Almatyda Azııa daýysy baıqaýynda óner kórsetken edim. Onda 22 eldiń ishinen gran-prı jeńip aldym. Bul jeńis maǵan óz mansabymdy sátti qalyptastyrýǵa múmkindik berdi. Sol sebepti meniń júregimde Qazaqstan týraly tek jyly estelikter ǵana bar, — dedi mońǵolııalyq ánshi Jibek Joly telearnasynyń «Búgin LIVE» baǵdarlamasynda..

Sondaı-aq ol bizdiń elde jeke kontsertimen kelip turatynyn atap ótti.

— Qaıda júrsem de qazaq halqy men memleketine óz rızashylyǵymdy umytpaımyn. Bul elge taǵzym retinde 2012 jyly jeke kontsertimmen kelgenmin. Almatyda Sýtdentter saraıynda jáne Astanada Kongress-holda óner kórsettik. Bul elge sońǵy ret 2018 jyly keldim, ol joly Almatydaǵy «Alataý» teatrynda án shyrqadym. Al osy jyly qarasha aıynda jeke kontsertimmen taǵy da kelip qalýym múmkin, — dedi ol.

Sondaı-aq Mońǵolııanyń halyq ártisi bul baıqaýdyń aýqymy áldeqaıda keń taralatynyna senim bildirdi.

— Maǵan bul baıqaýdaǵy atmosfera qatty unady. Qytaı, Grýzııa, Armenııadan kelgen ádil qazylarmen birge jumys istep jatyrmyz. Men Qazaqstannyń taǵy bir márte «dostyq kópirin» ashyp jatqanyna qýanyshtymyn. Jibek Joly telearnasy men Qytaıdyń ortalyq televıdenıesi CCTV birlese júzege atqaryp jatqan telejobany kóptegen elder ózinde translıatsııalaıdy dep oılaımyn, — dedi ánshi.

Bıyl Sarantýıa hanymnyń sahnada júrgenimen 39 jyl tolǵan. 22 albomy bar. Sondaı-aq óz elinde «Ǵasyr ánshisi» degen ataqqa ıe bolǵan tanymal óner juldyzy.

Buǵan deıin ádilqazy múshesi Samıra Efendı Silk Way Star birden 12 elge tanylýǵa múmkindik beretinin aıtqan edi.