Kashalottyń ishinen quny 500 myń eýro bolatyn qalqymaly altyn tabyldy
ASTANA. QazAqparat – La-Palma Kanar aralynyń jaǵalaýyna shyǵyp qalǵan óli kashalottyń ishinen quny 500 myń eýroǵa baǵalanatyn baǵaly tas tabyldy, dep habarlaıdy QazAqparat tilshisi.
The Guardian basylymynyń jazýynsha, Las-Palmas ýnıversıteti Janýarlar densaýlyǵy jáne azyq-túlik qaýipsizdigi ınstıtýtynyń basshysy Antonıo Fernandes Rodrıges sútqorektiniń ólimine ne sebep bolǵanyn anyqtamaq bolǵan. Kashalottyń as qorytý júıesinde problema bolý múmkin ekendigine kúdiktengen ol toq ishegin qarap, onyń ishinde qatty bir zattyń turyp qalǵanyn anyqtaǵan.
«Toq ishekten alyp shyqqanym dıametri 50-60 sm, salmaǵy 9,5 keli bolatyn tasqa uqsaıtyn zat boldy», - dedi ol.
Ǵalym tapqan zat qalqymaly altyn dep atalatyn óte sırek kezdesetin sur ambra bolyp shyqty. Ambra ǵasyrlar boıyna parfıýmerlerdiń qasıetti graali sanalady. Tabylǵan ambranyń quny shamamen 500 myń eýro turady.
Kıt kalmarlar men teńiz qurttaryn óte kóp jeıdi. Sútqorekti olardyń bárin qoryta almaı qusyp tastaıdy. Biraq, birazy kıttiń asqazanynda qalyp, jyldar óte kele súr ambraǵa aınalady.
