Qashaǵannyń munaıy qyrkúıektiń 24-inde óndirile bastaıdy - Saýat Myńbaev

ASTANA. QazAqparat - Qashaǵannyń munaıy qyrkúıektiń 24-inde óndirile bastaıdy. Búgin Aqordada ótip jatqan QR Úkimetiniń keńeıtilgen otyrysynda «QazMunaıGaz» UK» AQ Basqarma tóraǵasy Saýat Myńbaev málim etti.

Jıyn barysynda Elbasy birqatar óńir basshylaryn tyńdaı kele, Qashaǵan máselesine nazar aýdardy. «Elimizdiń kútip otyrǵany Qashaǵannyń alǵashqy munaıy. Onyń Qazaqstanǵa, eldiń damýyna ákeletin paıdasy mol. Ne bolyp jatyr jaǵdaı?», dep surady Memleket basshysy ulttyq munaı-gaz kompanııasynyń basshysyna qarata aıtqan sózinde. «Qashaǵan buıyrsa osy aıdyń aıaǵynda munaı óndirýge kirisedi. Sosyn qarasha aıynyń sońyna taman, buıyrsa kommertsııalyq óndirýge jetýdi oılaǵan josparymyz bar. Endi jumystar aqyryndap, baıyppen atqarylýda. Buıyrsa, qyrkúıektiń 24-inde alǵashqy munaı óndirýdi bastamaq», dedi «QazMunaıGaz» UK» AQ Basqarma tóraǵasy Saýat Myńbaev.

Óz kezeginde Prezıdent Qashaǵanǵa qatysty máseleni baıandap turýdy tapsyrdy.