Qashaǵannyń arqasynda elimizde keme qurylysy damýda - Nazarbaev

ASTANA. QazAqparat - Memleket basshysy Nursultan Nazarbaev munaı salasynyń ókilderimen kezdesti, dep habarlady Aqordanyń baspasóz qyzmeti.

Kezdesýge ınvestorlar, otandyq jáne shetel munaı-gaz kompanııalarynyń basshylary, memlekettik organdar ókilderi, munaı-gaz salasynyń ardagerleri qatysty. Memleket basshysy munaı-gaz ındýstrııasynyń el ekonomıkasyn damytýda jáne azamattardyń ál-aýqatyn jaqsartýda erekshe mańyzy baryn atap ótti.

 «Qashaǵan ken ornynyń ashylýy álemdik energetıka salasyndaǵy sońǵy 50 jyldaǵy eń erekshe oqıǵa boldy. Onyń qory 4,5-ten 5,5 mlrd tonnaǵa deıin munaı jáne 3 trln tekshe metr gazǵa baǵalanýda. Qashaǵan qazaqstandyqtardyń ál-aýqatyn arttyrýda iri jobalardyń biri bolyp tabylady. Barshańyzdy ken ornynyń iske qosylýymen quttyqtaımyn», - dep atap ótti Qazaqstan Prezıdenti.

Nursultan Nazarbaev Soltústik-Kaspıı jobasy tıimdi halyqaralyq yntymaqtastyqqa jáne ashyq áriptestikke   mysal bolatynyn atap ótti.