Qashaǵannan táýligine 200 myń barrel munaı óndiriletin merzim belgili boldy

ASTANA. QazAqparat  - Qazaqstan OPEK-tiń munaı óndirý kólemin taǵy 6 aıǵa shekteý usynysyn talqylaýda. Bul týraly búgin QR Úkimetindegi baspasóz máslıhatynda elimizdiń Energetıka mınıstri  Qanat Bozymbaev málim etti, dep habarlaıdy QazAqparat.

«Ótken aptada Qazaqstanǵa Saýd Arabııasynyń Energetıka mınıstri kelip ketti. Biraz máseleni talqyladyq. Talqylaý barysynda Saýd Arabııasynyń Energetıka mınıstri usynys (munaı óndirý kólemin azaıtý) jasady. Aldaǵy ýaqytta OPEK-ke múshe jáne onymen kelisimge kelgen memleketterdiń kelisimsharty bitedi. Sondyqtan olar ony taǵy jarty jylǵa nemese 9 aıǵa uzartýdy usynyp otyr. Biz bul máseleni qarastyratyndyǵymyzdy, eger jańa kelisimshartqa kirsek nemese onyń merzimin uzartatyn is-sharalar jasasaq ol tek OPEK-pen talqylaýdyń  nátıjesinde bolatyndyǵyn aıttyq», - dedi Bozymbaev BAQ ókilderiniń saýalyna oraı.

Onyń sózine qaraǵanda, búginde Qazaqstan táýligine 1 mln 700 myń barrel munaı óndirýge qaýqarly. Degenmen, OPEK-pen aradaǵy kelisimge sáıkes kúnine 20 myń barrel munaıdy kem óndirip otyr.

«Biz aldaǵy eki aıdyń ishinde sol mindettememizdi oryndaımyz. Biraq, ekinshi jartyjyldyqta Qashaǵanda munaı óndirý kólemi  artatyn bolady. Ózderińiz de biletindeı, Qashaǵannyń táýliktik munaı óndirý kólemi 140-150 myń barrel  bolyp otyr. Al ekinshi jartyjyldyqta kúndelikti 200 myńnan astam barrel munaı óndiriledi»,-  dedi ol.

Bul rette mınıstr qazirgi kúni munaı baǵasynyń tómendep otyrǵanyn, búgin tańerteń barrel 48,5 dollar bolǵanyn atap ótti.

«Bul máseleni talqylaımyz. Biraq olardyń kelisimine qandaı shartpen qosylatyndyǵymyz, qandaı kólemdi shekteıtindigimiz belgisiz. Osy máseleni talqylaý úshin mınıstrlikten men nemese meniń orynbasarlarym 24-25 mamyrda Venaǵa barady», - dedi Bozymbaev.