«Qashaǵannan» munaı óndiretin NCOC kompanııasyna jańa basqarýshy dırektor keldi

ATYRAÝ. KAZINFORM – Soltústik Kaspıı jobasynyń operatory – NCOC kompanııasynyń jańa basqarýshy dırektory qyzmetine kiristi. 

NCOC kompanııasy 2016 jyldan beri Kaspıı teńiziniń qazaqstandyq sektoryndaǵy «Qashaǵan» ken ornynan munaı óndiredi. Endi atalǵan kompanııanyń basqarýshy dırektory laýazymyn Djankarlo Rýıý atqaratyn boldy.

«Djankarlo Rýıýdyń Qazaqstanda jáne halyqaralyq aýqymdaǵy munaı-gaz ken oryndaryn basqarý strategııasy salasynda jıyrma jyldan astam tájirıbesi bar. Ol Italııadaǵy Pıza ýnıversıtetin bitirip, «Azamattyq qurylys» magıstri dárejesin alǵan. Sodan beri basqarýshylyq daǵdysyn jetildirip, múddeli taraptarmen berik qarym-qatynas ornatý boıynsha tájirıbe jınaqtady. Ol túrli óndiristik jobalardyń barlaý, ıgerý jáne paıdalaný, sondaı-aq bıznesti damytý jumystarynyń tolyq tsıklin qamtıtyn salalaryna jaýapty jumystardy atqaryp keldi», - dep habarlady kompanııanyń baspasóz qyzmeti.

Ár jyldary Abý-Dabıdegi Eni/ADNOC birlesken kásipornynda jerústi operatsııalary baǵdarlamasynyń jetekshisi, «Eni Ghana» kompanııasynyń basqarýshy dırektory, «North Caspian Operating Company» kompanııasynyń 1-kezeńdi ázirleý jónindegi dırektory laýazymyn atqarǵan. Osy kezge deıin «Karachaganak Petroleum Operating B.V.» kompanııasynyń bas dırektory bolǵan.

Eske sada ketelik, buǵan deıin NCOC kompanııasynyń basshylyǵy aýysatyny habarlanǵan edi.