«Qashaǵannan» munaı óndiretin NCOC kompanııasy 12,4 mlrd teńge aıyppul tóledi

ATYRAÝ. KAZINFORM – Kaspıı teńizindegi «Qashaǵannan» munaı óndiretin NCOC kompanııasyna salynǵan 12 mlrd 419 mln teńge aıyppul óndirilgen.

Ekologııalyq retteý jáne baqylaý komıetiniń málimetinshe, 2022 jyly ekologııalyq ınspektsııa «North Caspian Operating Company» (NCOC) kompanııasynyń teńiz keshenine tekserý júrgizilgen. Sonyń nátıjesimen ekologııalyq talaptardyń normalaryn buzý, onyń ishinde ekologııalyq ruqsatsyz kúkirtti gazdy jaǵý, óndiristik sýlardy Kaspıı teńizine tazartýsyz aǵyzý faktileri anyqtalǵan.

«NCOC kompanııasyna qatysty 5 ákimshilik is qozǵaldy. Ákimshilik ister Atyraý qalasynyń ákimshilik quqyq buzýshylyq jónindegi mamandandyrylǵan sotynda qaraldy. Bıylǵy aqpan aıynda Atyraý qalasy sotynyń apellıatsııalyq satysymen kompanııaǵa 12 mlrd 419 mln teńge kóleminde aıyppul salyndy. Aıyppul tolyq kólemde tólendi», - dep habarlady atalǵan komıtetten.

Alaıda qazir buzýshylyqtardy joıý týraly buıryq Joǵarǵy sotta qaralyp jatyr. Buǵan deıin Astana qalasy sotynyń 1-shi jáne 2-shi satysynda nusqama zańdy jáne negizdelgen dep tanylǵan bolatyn.

Eske sala ketelik, budan buryn Atyraý oblysynda ekologııany búldirgenderge 48 mlrd teńge aıyppul salynǵanyn habarlaǵan edik.