Qashaǵannan alǵashqy munaı partııasy Baký portyna jiberildi
ASTANA. KAZINFORM - Qazaqstandyq «Taraz» tankeri Qashaǵan munaıymen Aqtaý portynan Bakýge jolǵa shyqty.
Jetkizý «QazMunaıGaz» kompanııalar tobynyń Memleket basshysynyń otandyq kómirsýtekter eksportynyń balamaly baǵyttaryn damytý jónindegi tapsyrmasyn oryndaý sheńberinde júzege asyrylyp jatyr.
Kompanııanyń baspasóz qyzmeti habarlaǵandaı, ary qaraı munaı Baký-Tbılısı-Djeıhan (BTD) qubyr júıesi arqyly Jerorta teńizine deıin tasymaldanady. Eksporttaýshy - «QMG Qashaǵan B.V».
Bul qadam Transkaspıı halyqaralyq kólik baǵytyn odan ári damytýǵa yqpal etedi. 2022 jyly «QazMunaıGaz» UK AQ men Ázerbaıjannyń SOCAR memlekettik munaı kompanııasy arasynda qazaqstandyq munaı tranzıti týraly Bas kelisimge qol qoıylǵan bolatyn.
2024 jylǵy naýryzda QMG men SOCAR arasynda Ázerbaıjan Respýblıkasynyń aýmaǵy arqyly munaı tranzıtin kezeń-kezeńimen ulǵaıtý týraly kelisim jasaldy. Qujatta jetkizý kóleminiń jylyna 2,2 mln tonnaǵa deıin artýy kózdelgen.
«QMG Qashaǵan B.V.» ─ Soltústik Kaspıı boıynsha Ónim bólisý týraly kelisimdegi (ÓBK) qazaqstandyq qatysý úlesin basqaratyn «QazMunaıGaz» UK» AQ enshiles uıymy. Kelisimdegi kompanııanyń úlesi 16,88% quraıdy.
Ol QMG-nyń ÓBK múddelerin bildiredi jáne Soltústik Kaspıı jobasy (SKJ) sheńberinde Kaspıı teńizinde kómirsýtek resýrstaryn barlaý jáne óndirý boıynsha munaı operatsııalaryn júrgizýge qatysady.
«QMG Qashaǵan B.V» ÓBK boıynsha óz úlesin derbes tasymaldaıdy jáne satady.
Qatar kompanııasy Qashaǵan gazyn óńdeıtin zaýyttyń 75 paıyz aktsııasyn satyp alatynyn jazǵan bolatynbyz.