Qashaǵanǵa qatysty daý Vashıngtonda qaralady: QR Ádilet mınıstrligi istiń mán-jaıyn aıtty
ASTANA. KAZINFORM – QR Ádilet vıtse-mınıstri Dánıel Vaısov Qashaǵan men Qarashyǵanaqtaǵy iri munaı-gaz jobalarynyń ınvestorlarymen Qazaqstannyń arbıtrajdyq isi qaı satyda ekenin aıtty.
Atap aıtqanda, 2023 jyly North Caspian Operating Company kompanııasyna júrgizilgen tekserý qorytyndysynda kúkirttiń normadan tys saqtalǵany anyqtaldy. Ruqsat etilgen 730 myń tonna kúkirttiń ornyna 1 mln 750 myń tonna kúkirt saqtalǵan. Sol sebepti, Qazaqstan Qashaǵan operatoryn ekologııalyq normalardy óreskel buzǵany úshin 2,3 trln teńge nemese 5,1 mlrd dollarǵa sotqa bergen edi.
Bul máselemen Ádilet mınıstrliginiń qoldaýymen Ekologııa mınıstrligi aınalysyp jatyr.
— Qazirgi ýaqytta sottyń birinshi satydaǵy sheshimi Qazaqstan Respýblıkasynda shyǵaryldy. Bul rette elimizdiń ustanymy zańdy dep tanyldy. Naýryz aıynda alty merdiger apellıatsııalyq shaǵym túsirdi, - dedi Dánıel Vaısov Senatta tilshiler suraǵyna jaýap bere otyryp.
Apellıatsııalyq shaǵym Qazaqstan sotynda qaralyp jatyr.
Sonymen qatar, Qashaǵan ınvestorlary da arbıtrajdyq talap-aryz berdi.
— Ol ekijaqty halyqaralyq kelisimder boıynsha berildi. Bular — Qazaqstan Respýblıkasy men Frantsııa Respýblıkasy arasyndaǵy kelisim jáne Qazaqstan Respýblıkasy men Nıderlandy Koroldigi arasyndaǵy kelisim. Bul daý Vashıngtonda ICSID (International Centre for Settlement of Investment Disputes) aıasynda qaralady. Qazirgi ýaqytta Vashıngton boıynsha arbıtrajdyq trıbýnaldy qurý júrip jatyr. Sondyqtan bul másele boıynsha Ádilet, Ekologııa jáne Energetıka mınıstrligi birlesip jumys isteýde, - dedi vıtse-mınıstr.
Dánıel Vaısovtyń sózine qaraǵanda, Qarashyǵanaq boıynsha aralyq sheshim qabyldandy. Qazirgi ýaqytta bul baǵytta tıisti jumys jalǵasady.
Aıta keteıik, Bloomberg Qarashyǵanaq munaıyn ıgerýshi kompanııalar halyqaralyq tórelikte utylyp, Qazaqstanǵa ótemaqy tóleýi múmkin ekenin jazǵan bolatyn.
Eske salsaq, byltyr kúzde Energetıka mınıstrligi Qashaǵan jobasynyń sot isine baılanysty resmı túsinik berdi.
Qashaǵan ken ornyn ıgerýshi NCOC kompanııasy ekologııalyq aıyppulǵa baılanysty túsirgen talap aryzǵa saı, Qazaqstan halyqaralyq tórelikke qatysady.
