Qashaǵandy lańkestik shabýyldan qorǵaýǵa tıispiz - Erǵojın
«Zań jobasynda teńiz jedel shtabyn qurýdy kózdeıdi. Búgingi kúni jumys isteıtin barlyq shtabtar Qazaqstannyń jer ústi aýmaǵyn ǵana qamtıdy. Teńiz keńistiginde shtab joq. Sondyqtan da zańnamalyq turǵyda teńizde lańkestikke qarsy is-sharalardy júrgizý múmkinshiligin bekitkimiz keledi. Ol úshin biz shekara qyzmetimizge, onyń bizdiń departamenttegi ókiline jergilikti jerlerde sáıkesinshe shtab qura otyryp, lańkestikke qarsy áreket etýine quziret bermekpiz», - dedi QR UQK tóraǵasynyń orynbasary búgin Zań jobalaý qyzmeti máseleleri jónindegi vedomstvoaralyq komıssııasynyń kezekti otyrysynda «Lańkestikke qarsy is-qımyl týraly» QR Zańyna ózgertýler engizý týraly» zań jobasynyń tujyrymdamasyn tanystyrǵannan keıin BAQ ókilderine bergen suhbatynda.
Onyń aıtýynsha, qazirgi ýaqytta bul baǵyttaǵy jumystardy QR Ulttyq qaýipsizdik komıtetiniń Shekara qyzmeti júzege asyrýda. Qajettilik týyndaǵan jaǵdaıda oǵan ózge quqyq qorǵaý organdar men Qarýly kúshter de jumyldyrylyp keledi.
«Kaspıı teńizinde lańkestik operatsııanyń jasalýyna eshqandaı alǵyshart joq. Degenmen, qaýipsizdikti qamtamasyz etý, onyń ishinde jerústi jáne jerústindegi emes nysandardy qorǵaý úshin barlyq sharalardy qabyldaýymyz qajet. Bizde teńizde ken oryndar óte kóp. Máselen, Qashaǵan bar. Ol lańkestik shabýylǵa álsiz nysan jáne ony qorǵaýǵa tıispiz», - dedi Erǵojın.
Onyń atap ótýinshe, zań jobasyn osy jyldyń 1 qarashasynda Parlament qaraýyna engizý josparlanyp otyr.
Zań jobasy 2018 jyldyń 1 qańtarynan kúshine ende dep kútilýde
