Qashaǵandy ıgerýshiler qorshaǵan ortany lastasa, ekologııalyq aıyppuldar salynady

ASTANA. 16 qańtar. QazAqparat - Qashaǵandy ıgerýshilerge qorshaǵan ortany lastaǵan jaǵdaıda, ekologııalyq aıyppuldar salynady. Bul týraly búgin baspasóz máslıhatynda QR Munaı jáne gaz mınıstri Uzaqbaı Qarabalın málimdedi.

«Qashaǵandy ıgerýshiler qorshaǵan ortany lastaǵan jaǵdaıda, kelisimshartta belgilengen sanktsııalar men aıyppuldar salynady. Munyń barlyǵy Qorshaǵan ortany qorǵaý mınıstrliginiń quzyrynda. Olar merdigermen birneshe ret kezdesýler ótkizip, ýly gazdyń kólemin naqtylady», - dedi Uzaqbaı Qarabalın.

Onyń aıtýynsha, naqty sandar aıdyń sońyna qaraı belgili bolady. «Búginde gaz júıesi boıynsha zertteýler júrgizilip jatyr. Olardaǵy barlyq olqylyqtardyń sany 27-ge jetken. Qazir málimetterdi zerttep-zerdeleý júrip jatyr. Bizdiń oıymyzsha, aıdyń sońyna deıin jumystar aıaqtalady. Sodan soń merdiger gaz qubyry men jalpy qubyrlardyń jumys josparyn tanystyrady», - dedi mınıstr.