Qashaǵandaǵy munaı óndirisin jańǵyrtýǵa ketetin shyǵyn merdigerge artylady - Uzaqbaı Qarabalın

ATYRAÝ. QazAqparat - Qashaǵan ken ornyndaǵy munaı óndirisin jańǵyrtýǵa ketken shyǵyn merdigerge artylady, dep habarlady QR Energetıka mınıstriniń birinshi orynbasary Uzaqbaı Qarabalın.

«Óndiristi jańǵyrtýǵa ketken barlyq shyǵyn, onyń ishinde 200 kılometrlik eki qubyrdyń aýystyrylýyn da merdiger óz moınyna alýy tıis. Bul shara munaıdy kommertsııalyq óndirý úrdisin buzǵanǵa qatysty Qashaǵan boıynsha Ónimderdi bólisý týraly kelisimde qarastyrylǵan sanktsııaǵa sáıkes qoldanylady. Eger 2013 jyldyń 1 qazanyna deıin merdiger kommertsııalyq óndiristi qamtamasyz etip úlgermese, ary qaraı jumys shyǵynynyń orny toltyrylmaıdy. Sondyqtan qazir júrgizilip jatqan jumystarǵa tólenbeıdi», - dedi U.Qarabalın.

Eske sala keteıik, Atyraý oblysy Qashaǵan ken ornynda 2013 jyly kúzde bastalǵan munaı óndirisi ýaqytsha toqtatylǵan. Buǵan qubyrlardyń tozýy sebep bolǵan. Aldyn ala boljam boıynsha, óndirý isi 2016 jyly jańǵyrtylady.