Qashaǵandaǵy munaı óndirisi táýligine 450 myń barrelge jetýi múmkin

ATYRAÝ. QazAqparat - Qashaǵandaǵy munaı óndirisi táýligine 450 myń barrelge jetýi múmkin, dep habarlaıdy QazAqparat tilshisi.

«Qashaǵan munaı ken ornyndaǵy nysandardy alǵashqy kúrdeli jóndeý kezinde NCOC birqatar jobany iske asyrdy. Ári teńiz keshenindegi gazdy aıdaý júıesiniń modıfıkatsııasyn ózgertti, keshendegi kompressorlar jańǵyrtyldy. Sonyń arqasynda gaz aıdaý kólemin arttyrý jáne munaı óndirý kólemin táýligine 400 myń barrelge jetkizý múmkindigi týdy», - deıdi «Nort Kaspıan Opereıtıng Kompanı» basqarýshy dırektory Rıchard Hoýv.

Onyń aıtýynsha, aldaǵy ýaqytta gaz aıdaıtyn qosymsha kompressor ornatylyp, nysandardyń arasyna qosymsha qubyrlar jatqyzylady.

«Qazaqstan úkimeti maquldaǵan osy sharalar munaı óndirý kólemin táýligine 450 myń barrelge jetkizý múmkindigin beredi», - deıdi R. Hoýv.