Qashaǵandaǵy jóndeý jumystarynyń merzimi keıinge shegerile me — mınıstrlik jaýaby
ASTANA. KAZINFORM — Munaı men gaz óndiretin ken ornyndaǵy jóndeý jumystarynyń ýaqyty ózgerýi yqtımal. Bul jóninde QR Energetıka mınıstri Erlan Aqkenjenov málimdedi.
Mınıstr ken orny operatory NCOC 1 maýsymda teńizdegi óndiris obektileriniń jáne munaı men gazdy óńdeıtin zaýyttyń jumysyn toqtatatyny týraly aqparatqa qatysty pikir bildirdi.
— Iá, biz jóndeý merzimin ózgertýdi qarastyryp jatyrmyz, — dedi Erlan Aqkenjenov V Eýrazııalyq ekonomıkalyq forým kýlýarynda jýrnalıster suraǵyna jaýap bere otyryp.
Salalyq BAQ málimetine júginsek, josparly jóndeý jumystary 35 kúnge sozylady. Onyń áserinen maýsym aıynda jáne shildeniń basynda qazaqstandyq munaı eksportynyń kólemi táýligine shamamen 400 myń barrelge azaıady dep boljanǵan bolatyn.
Aıta keteıik, buǵan deıin KQK-men munaı tasymaldaý tarıfterine qatysty mınıstr málimdemesin jarııalaǵanbyz.
