Qashaǵandaǵy jańa zaýyt jylyna 727 mln tekshe metr gaz óndiredi
ASTANA. KAZINFORM — Qashaǵan gaz óńdeý zaýytyndaǵy qurylys jumystarynyń oryndalý deńgeıi 60 paıyzǵa jetti, dep habarlaıdy Energetıka mınıstrliginiń baspasóz qyzmeti.
Atyraý oblysyna jumys sapary barysynda jobanyń iske asyrylý barysyn Energetıka mınıstri Erlan Aqkenjenov baǵalady. Mınıstrliktiń málimetinshe, zaýyt paıdalanýǵa berilgennen keıin jylyna 1 mlrd tekshe metr ilespe gazdy óńdep, jyl saıyn shamamen 727 mln tekshe metr taýarlyq gaz óndirýge múmkindik beredi.
Jobany «QazaqGaz» UK» AQ-nyń enshiles uıymy — «GPC Investment» JShS iske asyryp jatyr. Zaýyt elimizdiń gaz óńdeý salasyndaǵy negizgi nysandardyń birine aınalyp, Qashaǵan ken ornyn ıgerý barysynda óndiriletin ilespe gazdy óńdeý kólemin ulǵaıtýǵa múmkindik beredi.
Qazir qurylys alańyna negizgi jabdyqtyń 97 paıyzy jetkizildi. Vahtalyq kent pen iri kólemdi júkterdi jetkizýge arnalǵan temirjol ınfraqurylymynyń qurylysy aıaqtaldy. Jobany iske asyrýǵa shamamen eki myń maman tartylǵan. Tehnologııalyq jabdyqtardy montajdaý, ınjenerlik kommýnıkatsııalardy tartý jáne negizgi óndiristik nysandardyń qurylysy jalǵasyp jatyr.
Nysanǵa barý barysynda mınıstrge qurylys-montaj jumystarynyń barysy, jabdyqtardy jetkizý jáne jobanyń kelesi kezeńderin iske asyrý týraly aqparat usynyldy. Tapsyrys berýshiniń málimetinshe, qurylys bekitilgen kestege sáıkes jedel qarqynmen júrgizilip keledi.
— Qashaǵan gaz óńdeý zaýyty Qazaqstannyń gaz salasyn odan ári damytý úshin strategııalyq mańyzǵa ıe. Gaz óńdeý zaýytyn iske qosý ilespe gazdy óńdeý kólemin ulǵaıtýǵa, elimizdegi eń iri munaı-gaz ken oryndarynyń birin ıgerý tıimdiligin arttyrýǵa jáne ishki naryqty qosymsha kólemdegi taýarlyq gazben qamtamasyz etýge múmkindik beredi. Búgingi mindetimiz — kásiporyndy belgilengen merzimde paıdalanýǵa berý, — dedi Energetıka mınıstri.
«QazaqGaz» AQ» basqarma tóraǵasy Álibek Jamaýovtyń sózinshe, jobany iske asyrý jumystary kompanııanyń turaqty baqylaýynda.
— Jobanyń el ekonomıkasyna mańyzdylyǵyn eskere otyryp, biz Qashaǵan gaz óńdeý zaýytynyń joǵary sapaly, qurylys jumystarynyń ýaqtyly aıaqtalýyn qamtamasyz etý úshin barlyq qajetti sharalardy qabyldap jatyrmyz, — dedi Jamaýov.
Osyǵan deıin Qashaǵan ken ornynyń shıkizat bazasynda qýattylyǵy jylyna 2,5 mlrd tekshe metr bolatyn jańa gaz óńdeý zaýytynyń qurylysy bastalǵanyn jazǵanbyz.
