Qashaǵandaǵy gaz óńdeý zaýytynyń irgetasy quıylyp bitýge jaqyn
ASTANA. KAZINFORM – «QazaqGaz» ulttyq kompanııasy» aktsıonerlik qoǵamynyń basqarma tóraǵasy Álibek Jamaýov Qashaǵan ken ornynda gaz óńdeý zaýytyn salý jobasy qandaı satyda ekenin aıtty.
- Qashaǵan ken ornynda jylyna 1 mlrd tekshe metr gaz óńdeıtin zaýyt salý jobasy strategııalyq joba bolyp esepteledi. Onyń arqasynda taýarlyq gaz ben túıirshiktelgen kúkirttiń, suıytylǵan munaı gazynyń óndiris kólemi artady, - dedi Álibek Jamaýov «Samuryq-Qazyna» qory qoǵamdyq keńesiniń otyrysynda.
Onyń sózinshe, joba qarqyndy júrip jatyr.
- Qurylys alańyna 2 myńnan astam qurylysshy men maman, 330-dan astam arnaıy tehnıka jumyldyrylǵan. Alyp pishindi qondyrǵyny jınaqtaý jumysy aıaqtaldy. Іrgetas quıý jumystary da bitýge jaqyn. Metall qurandylardy ornatý, qondyrǵyny jınaqtaý, rezervýar tósep, tehnologııalyq kommýnıkatsııa ınfraqurylymyn ornatý jumystary bastaldy. Zaýyt qurylysyn 2026 jyly aıaqtaý josparlanǵan, - dedi ulttyq kompanııa basshysy.
Buǵan deıin Astana soty Qashaǵan operatoryna berilgen Ekologııa mınıstrliginiń nusqamasyn joıǵanyn jazǵan edik.