Qashaǵanda jumystar bekitilgen kestege saı júrip jatyr - S. Myńbaev
«Qashaǵan boıynsha jumystar kestege sáıkes júrip jatyr. Atap aıtqanda, qubyrlardy dánekerleý jumystary boıynsha keıbir qıyndyqtar boldy. Burynǵysha osy úlken jobana iske qosý bıylǵy qazanǵa begilenip otyr»,-dedi S. Myńbaev.
Degenmen de ol kommertsııalyq óndirý deńgeıine joba qaı mezgilde shyǵatynyn naqty aıtpady.
«Kommertsııalyq óndirýge jetý ólshemi táýligine 75 myń barreldi qamtıdy. Kez kelgen jańa óndiris qandaı qarqynmen óndirýdi eńseretindigi ońaı jumys emes. Osy oraıda, Qashaǵan qarasha-jeltoqsan kezeńinde qandaı úlesin qosatyndyǵyn aıtý qıyndaý. Alaıda, josparlaǵan óndirý kólemin biz eskerip otyrmyz»,-dep toqtaldy S. Myńbaev.
Budan buryn Qashaǵan iske qosylǵannan keıin 1,5 aıdyń ishinde kommertsııalyq ónim shyǵara alatyny aıtylǵan bolatyn.
Esterińizge sala keteıik, 2014 jyldyń qarashasynda Atyraýda «Nort Kaspıan Opereıtıng Kompanı B.V. («NKOK») kompanııasy Qashaǵan teńiz kenishinde qubyrlardy aýystyrý jobasyn ázirleý týraly habarlady, sonyń sebebinen munaı óndirý toqtatylǵan bolatyn.
Joba teńiz kenishiniń D aralynan óndirilgen ónimderdi «Bolashaq» munaı jáne gaz keshendi ázirleý qondyrǵysyna tasymaldaýǵa arnalǵan kúkirtti munaı qubyry men kúkirtti gaz qubyryn aýystyrý jumystaryn qamtıdy.
2013 jyly kúzde bastalǵan Qashaǵan kenishinen munaı óndirý teńizden qurlyqqa tartylǵan 93 shaqyrymdyq qubyrdyń jarylýy saldarynan toqtatylǵan bolatyn. Sońǵy aqparattarǵa súıensek, «Bolashaq» zaýytynan «D» aralyna (ken orny - avt.) deıingi qubyrlardy aýystyrý jumystary 2016 jyldyń ekinshi jartysynda aıaqtalýy tıis.