Qashaǵanda jóndeý jumysyn keıinge qaldyrý jóninde naqty sheshim qabyldanǵan joq — mınıstrlik
ASTANA. KAZINFORM — Energetıka mınıstrligi Qashaǵan ken ornyndaǵy jóndeý jumystarynyń keıinge shegerilgeni jaıly aqparatty joqqa shyǵardy.
Mundaı jańalyqty birqatar halyqaralyq agenttikter taratqan bolatyn.
Onda Qazaqstannyń North Caspian Operating Company (NCOC) konsortsıýmy aktsıonerlerine hat joldap, Qashaǵandaǵy qazan aıyna josparlanǵan jóndeý jumysyn kelesi jylǵa aýystyrýdy ótingeni, óıtkeni tabıǵı gaz tapshylyǵy bolýy múmkin dep alańdaǵany aıtylady.
Josparly jóndeý jumysy qazan aıynda bastalyp, 28 kúnge sozylýy kerek-ti.
Energetıka mınıstrliginiń málimetinshe, Qashaǵan ken ornyndaǵy jóndeý jumystarynyń keıinge qaldyrý nusqasy qarastyrylǵan.
«Alaıda bul tek burynǵy talqylaý deńgeıinde bolǵan. Eshqandaı sheshim áli qabyldanǵan joq. Qazaqstan OPEK+ kelisimin ustanyp, óz mindettemelerin tolyq oryndaý jáne OPEK hatshylyǵyna usynylǵan ótemaqy josparyn oryndaý boıynsha sharalar qabyldap jatyr» deıdi vedomstvodan.
Aıta keteıik, Qashaǵan gazyn óńdeıtin zaýyt 2026 jyly iske qosylady.
Kúni keshe, 4 qyrkúıekte Qashaǵan suıytylǵan gazyn jetkizý týraly shartqa qol qoıyldy.
