Qashaǵanda jylyna 2,5 mlrd tekshe metr gaz óńdeıtin zaýyttyń qurylysy bastaldy
ASTANA. KAZINFORM – Qazaqstanda Qashaǵan ken ornynyń shıkizat bazasynda qýattylyǵy jylyna 2,5 mlrd tekshe metr bolatyn jańa gaz óńdeý zaýytynyń qurylysy bastaldy. Jobany 2029 jyldyń sońyna deıin aıaqtaý josparlanyp otyr. Bul týraly QR Energetıka vıtse-mınıstri Qaıyrhan Tutqyshbaev málimdedi.
Onyń aıtýynsha, jańa zaýyt Qazaqstandaǵy taýarlyq gaz óndirisin arttyrýǵa baǵyttalǵan strategııalyq jobalardyń biri.
– Bıylǵy 12 maýsymda Qashaǵan ken ornynyń shıkizat bazasynda qýattylyǵy jylyna 2,5 mlrd tekshe metr bolatyn gaz óńdeý zaýytynyń qurylysy bastaldy. Jobany iske asyrý úshin EPC merdigerin aıqyndaý máselesi boıynsha Úkimet qaýlysy qabyldanǵan. Jobany iske asyrý jáne FEED satysyndaǵy jobalyq qujattamany ázirleý boıynsha EPC merdigermen kelissózder bastaldy. Sonymen qatar syrtqy ınfraqurylym nysandaryn iske asyrý boıynsha jumystardy oryndaýshy anyqtaldy», - dedi ol.
Sonymen birge, vıtse-mınıstr Qashaǵan ken ornynyń bazasynda qýaty jylyna 1 mlrd tekshe metr bolatyn taǵy bir gaz óńdeý zaýytynyń qurylysy júrip jatqanyn atap ótti.
– Atalǵan jobanyń jalpy oryndalý deńgeıi 59,39%-dy quraıdy. Zaýytty 2027 jyly paıdalanýǵa berý josparlanyp otyr, - dedi spıker.
Aıta keteıik, Qazaqstanda gaz taratý uıymdaryna jańa talap engizilýi múmkin
