Qashaǵanda shıki gaz óńdeý zaýytynyń qurylysy bastalady

NUR-SULTAN. QazAqparat – Bıyl Qashaǵanda shıki gaz óńdeý zaýytynyń qurylysy bastalady. Bul týraly Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Prezıdenttiń tapsyrmasyna sáıkes osy jyly Qashaǵan ken ornynyń shıkizat bazasynda quny 860 mln dollar turatyn, qýaty 1 mlrd tekshe metr shıki gaz óńdeý zaýytynyń qurylysyn bastaý josparlanýda. Jobany tabysty iske asyrý úshin memleket birqatar máselelerdi pysyqtady. Atap aıtqanda, joba shıkizatpen, ınfraqurylymmen qamtamasyz etilip, jobany qarjylandyrý máselesi pysyqtaldy», - dedi Nurlan Noǵaev.

Mınıstr Memleket basshysynyń gaz naryǵyn retteýdiń jańa tásilderin ázirleý, resýrstyq bazany ulǵaıtý jóninde sharalar qabyldaý boıynsha tapsyrmasyn iske asyrý maqsatynda Gaz salasyn damytýdyń 2030 jylǵa deıingi keshendi josparynyń jobasy ázirlenip jatqanyn da aıtqan edi.