«Qashaǵanda» munaı tógilgeni rastalsa, jospardan tys tekserý júrgiziledi

ATYRAÝ. KAZINFORM – Kaspıı teńiziniń qazaqstandyq sektoryndaǵy «Qashaǵan» ken ornynda munaı tógilgeni týraly derek áli rastalǵan joq. Osy derek rastalsa, jospardan tys tekserý júrgizý kózdelip otyr.

Atyraý oblysy boıynsha ekologııa departamentiniń baspasóz qyzmetinen málim etkendeı, búgin arnaıy top Kaspıı teńiziniń qazaqstandyq sektoryna áýeden sholý jasaýǵa attanǵan.

«Keshe, 1 sáýirde «Globýs» ekologııalyq-quqyqtyq bastamalar ortalyǵynyń atqarýshy dırektory Galına Chernova áleýmettik jelide aqparat jarııalady. Osyǵan baılanysty arnaıy top oqıǵa ornyna sholý júrgizý úshin teńizge attanyp ketti. Munaıdyń tógilgeni rastalsa, ekologııa departamenti NCOC kompanııasyna jospardan tys tekserý júrgizedi», -dep habarlady departamenttiń baspasóz qyzmeti.

Kaspıı teńizine sholý júrgizýge attanǵan top quramynda ekologııa departamentiniń basshysy Álibek Bekmuhametov, Atyraý oblysynyń mamandandyrylǵan tabıǵat qorǵaý prokýrory Erkebulan Ermekov, TJM Ónerkásiptik qaýipsizdik komıteti Atyraý oblystyq departamentiniń bólim basshysy Nurlan Álıev pen tehnık-laborant Baýbek Áldeshev bar.

Eske sala ketelik, Kaspıı teńizindegi Qashaǵan ken orny aýdanynda munaıdyń tógilý faktileri boıynsha munaı óndirý ornynda kózben sholyp qaraý jáne synama alý úshin teńizge shyǵýdy uıymdastyrady.

Eske sala ketelik, buǵan deıin «Qashaǵannan» munaı óndiretin NCOC kompanııasy 12,4 mlrd teńge aıyppul tólegenin jazǵan edik.

Búgin Kaspıı teńizindegi «Qashaǵan» ken ornynda munaı tógilýi múmkin ekenin habarlaǵan bolatynbyz.