Qashaǵanda munaı shyǵarý táýligine 80 myń barrelge artady

ATYRAÝ. QazAqparat - NCOC  Atyraý oblysyndaǵy Qashaǵan ken ornynda munaı óndirýdi táýligine 80 myń barrelge arttyrýdy josparlap otyr, dep habarlaıdy «QazAqparat» HAA tilshisi.

«Kompanııa Qashaǵan munaı-ken ornyndaǵy munaı qoryn ıgerýdiń eń ońtaıly ádisin qalyptastyrý boıynsha únemi jumys jasap keledi. Sol sebepti biz atqarylatyn jumystardy birneshe kezeńge bólýdi josparlap otyrmyz. Bul kezeńniń barlyǵy derbes joba retinde qarastyrylyp, onyń tıimdiligi naqty júıelengen, ınvestorlar shyǵynynyń ótemdiligi qamtamasyz etilgen bolýy tıis. Osyndaı jobalardyń biri retinde ylǵaldy gaz syǵý qýattylyǵyn arttyrýǵa ınvestıtsııa salýdy atap aıtýǵa bolady. Bul munaı shyǵarý isin táýligine 80 myń barrelge deıin arttyrýǵa múmkindik beredi», - dedi NCOC kompanııasynyń tehnıkalyq dırektory Ram Sıtharam.

Dál qazirgi ýaqytta Qashaǵan munaı kenishindegi munaı shyǵarý táýligine shamamen 200 myń barrelge teń.