Qashaǵanda anyqtalǵan kemshilikter tyńǵylyqty qarastyrylýda - U. Qarabalın
Otyrys barysynda QR Munaı jánge gaz mınıstri Uzaqbaı Qarabalın búginde elimizdiń munaı eksporty jylyna 70 mln. tonnadan asatyndyǵyn jáne ol álemniń 30-dan astam memleketine jetkiziletinin atap ótti.
Sonymen qatar U. Qarabalın tehnıkalyq sebepterge baılanysty Qashaǵan jobasy boıynsha budan keıingi is-qımyldar josparyn daıarlaý sharalary júrgizilip jatqandyǵyn jetkizdi.
«Uńǵymalar qalypty jumys istep jatyr. Jalpy keshenniń qyzmeti qalypty. Osyndaı qıyndyqtardy aldaǵy ýaqytta boldyrmas úshin anyqtalǵan kemshilikter tyńǵylyqty qarastyrylýda»,- dedi mınıstr.
Budan buryn habarlanǵandaı, ótken jyldyń kúzinde Qashaǵan ken ornynda munaı óndirý bastalyp, alaıda gaz qubyryndaǵy apat saldarynan toqtatylǵan bolatyn. Qazaqstan Úkimetiniń sońǵy málimdemesine qaraǵanda, Qashaǵannan ken óndirý 2015 jyldyń sońyna taman jandanýy múmkin.
Budan bólek mınıstr Qazaqstanda munaı-gaz salasyn damytýda kómirsýtek shıkizatyn tasymaldaýdyń eksporttyq baǵdarlaryn keńeıtý, elimizdiń óńirlerin gazben qamtamasyz etý, sondaı-aq shıkizatty qaıta óńdeý boıynsha óndiristik qýattardy keńeıtý men jańǵyrtý aıryqsha mańyzǵa ıe ekenin atap ótti.
Osy oraıda mınıstr Qazaqstan tarapy konstrýktıvti usynystar men álemdik úzdik tájirıbeni engizýge barynsha ashyq ekenin qadap aıtty.
Esterińizge sala keteıik, 15 maýsymda Máskeýde 21-shi búkilálemdik munaı kongresi óz jumysyn bastady. 19 maýsymǵa deıin jalǵasatyn bul sharaǵa álemniń 80 elinen 5000-ǵa jýyq delegattar jınaldy.
