Qashaǵan jobasyn basqarý júıesinde qaıta qurý júrip jatyr - U. Qarabalın

ASTANA. QazAqparat -Qashaǵan jobasyn basqarý júıesinde qaıta qurý jumystary júrip jatyr. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Munaı jáne gaz mınıstri Uzaqbaı Qarabalın osylaı málimdedi.

«Qashaǵan jobasynyń qymbattaýyna kelsek, bul birinshi jyl oryn alyp otyrǵan másele emes. Jalpy, qymbattaý týraly aıtatyn bolsaq, eger biz 1999 jyldary kelisimshart jasalǵanda ondaǵy joba da jospar da sol jyldardyń jaǵdaıymen eseptelgen, qazir jyl saıyn qymbattaý oryn alyp jatyr. Sondyqtan da, Qashaǵan jobasynyń qymbattaýy osymen baılanysty», - dedi Uzaqbaı Qarabalın.

Sonymen qatar, mınıstr Qashaǵan jobasyn basqarý júıesinde qaıta qurý jumystarynyń júrip jatqanyn atap ótti. Óıtkeni merdigerlerdiń ózi qoldanystaǵy júıeniń jetkilikti túrde tıimdi bolmaǵanyn, onyń birqatar baǵyttary qymbatqa soǵatynyn moıyndaǵan. Sondyqtan da, búgingi tańda jobanyń kóptegen shyǵyndaryn qysqartý baǵytynda túbegeıli jumystar qolǵa alynǵan.

«Qashaǵan jobasynyń qubyrynda jumysty toqtatýǵa qatysty máselege kelsek, bunymen muqııat aınalysyp júrmiz. Jalpy, bizde onyń shyǵý sebebin túsinýimiz basqasha bolsa, merdigerler odan basqa sebepti alǵa tartady. Soǵan qatysty qubyrlarǵa paıdalanylǵan materıaldar, dánekerleý tehnologııalary boıynsha óz tarapymyzdan tekserýlerdi jalǵastyratyn bolamyz. Sonyń ishinde dánekerleý tehnologııasyna qatysty merdigerlerge qoıatyn shaǵymymyz barshylyq. Al qubyr materıaldaryn merdigerler ózderi qaıta tekserip jatyr», - deıdi mınıstr.

Toqtala ketetin jaıt, Qashaǵandaǵy ken ornyn ıgerýdiń toqtatylýyna qatysty Qazaqstan tarapy kelissózder tobyn jasaqtaǵan. Atalmysh top ótken aptada Londonda daýly máselelerge óz ýájderin usyný úshin ekinshi márte kezdesý ótkizgen.