Qashaǵan tóńiregindegi daý: isti qarastyrý qaı satyda ótip jatyr

ASTANA. KAZINFORM – QR Energetıka mınıstri Almasadam Sátqalıev Qazaqstannyń Qashaǵan ken ornyn ıgerýshi alpaýyt kompanııalarǵa qoıǵan talap-aryzyna qatysty túsinik berdi.

Buǵan deıin osy máselege qatysty tolyq aqparat bıylǵy kúzde jarııalanatyny aıtylǵan. 

Alaıda mınıstr bul baǵyttaǵy protsess jalǵasyp jatqanyn atap ótti.

«Belgili bir protsedýralar bar. Osyǵan deıin tıisti tyńdaýlar júrip jatqanyn, Halyqaralyq trıbýnal taraptardyń ustanymdaryn qarastyryp jatqanyn aıttym. Munyń bári bıylǵy kúzdiń ekinshi jartysynda aıaqtalyp, biraz aqparat jarııalanady dep josparlaǵan edik. Ókinishke qaraı, atalǵan tyńdaýlar áli jalǵasyp jatyr. Osy rásimder naqty qashan aıaqtalatyny belgisiz. Bul másele halyqaralyq sottardyń quzyretinde», - dedi Almasadam Sátqalıev Parlament Májilistegi Úkimet saǵatynan keıin tilshiler suraǵyna jaýap bere otyryp.

Eske salsaq, bıyl jazda Qazaqstan tarapy Qashaǵan ken ornyn ıgerýshi alpaýyt kompanııalarǵa qoıǵan talap somasyn 150 mlrd dollardan 160 mlrd dollarǵa deıin ulǵaıtqany belgili bolǵan edi.