Qashaǵan operatorynyń serverleri men kompıýterlerine vırýs tarady
ATYRAÝ. QazAqparat - Kıbershabýyl Atyraý oblysynda Kaspıı teńizindegi Qashaǵan ken ornyn ıgerýmen aınalysatyn NCOC kompanııasynyń serverleri men kompıýterleriniń 10-20 paıyzyna áser etti, dep habarlaıdy QazAqparat tilshisi.
«Vırýs keńsedegi serverimiz ben osyndaǵy kompıýterlerimizdiń 10-20 paıyz kólemine tarady. Serverlerdiń rezervti kóshirmeleri bar, degenmen, jekelegen kompıýterlerdegi málimetterdiń joıylyp ketý qaýpi bar. Kelgen zardap aıtarlyqtaı nemese qaýipti emes, biraq bizge júıelerimizdi jiti tazalap, tekserip shyǵý qajet. Buǵan ýaqyt kerek bolady. Qalpyna keltirý protsess ústinde. Konsortsıým boıynsha seriktesterimizden qosymsha kómekter alyp jatyrmyz. Qalpyna keltirý jumystary naqty qashan aıaqtalatynyn aıta almaımyz. NCOC keńseleri 15 mamyr kúni jumys isteıtin bolady. Biraq júıelerimiz tolyǵymen qalpyna kelgenshe jekelegen shekteýler engiziledi», - delingen NCOC kompanııasy baspasóz qyzmetiniń QazAqparat tilshisiniń kıbershabýyldan kelgen zardaptyń kólemi jónindegi suraǵyna bergen jaýabynda.
Eske salaıyq, NCOC-tyń aqparattyq qaýipsizdik júıesi 12 mamyr kúni saǵat shamamen 18.00-de kompanııanyń serverlerine vırýstyq shabýyldy tirkedi. Aldyn alý sharasy retinde ınternet pen korporatıvti poshtaǵa qoljetimdik ýaqytsha toqtatyldy. Kıbershabýyl Qashaǵan nysandarynyń jumysyna kedergi keltirgen joq , óndiris shtattyq rejimde jalǵasýda.
