Qashaǵan operatorlary Qazaqstanǵa 2,3 trln teńge aıyppul tóleýge tıis
ASTANA. KAZINFORM — Qashaǵan ken ornyn ıgerip jatqan sheteldik kompanııalar Qazaqstanǵa ekologııalyq zańnamany buzǵany úshin sot sheshimi boıynsha 2,3 trln teńge kóleminde aıyppul tóleýi kerek. Bul týraly Ádilet vıtse-mınıstri Danıel Vaısov Ortalyq kommýnıkatsııalar qyzmetindegi brıfıng kezinde málimdedi.
Vıtse-mınıstrdiń aıtýynsha, sot sheshimi zańdy kúshine engen. Sot belgilegen merzimge deıin aıyppul tólenbegen jaǵdaıda májbúrlep óndirý sharalary qoldanylady.
— Qazirgi ýaqytta sheteldik kompanııalardyń 2,3 trıllıon teńge tóleý boıynsha mindettemeleri bar. Eger sheteldik kompanııalar 20 shildege deıin aıyppuldy tólemese, Qazaqstan Respýblıkasy zańnamaǵa sáıkes, onyń ishinde atqarýshylyq is júrgizý týraly zańǵa sáıkes tıisti sharalardy qabyldaıdy. Atqarýshylyq is júrgizý qozǵalyp, májbúrlep óndirip alý sharalary qoldanylady, — dedi Danıel Vaısov.
Vıtse-mınıstrdiń sózinshe, merdiger uıymdar qabyldanǵan sheshimdermen kelispeı, Investıtsııalyq daýlardy retteý jónindegi halyqaralyq ortalyqqa (ICSID) júgingen. Oǵan qosa, Qazaqstannyń memlekettik organdarynyń áreketterin daýlap jatyr. Qazirgi ýaqytta taraptar arbıtrler quramyn jasaqtaý jumystaryn aıaqtaý satysynda. Al arbıtraj quramyn shilde aıynyń sońyna deıin qalyptastyrý josparlanǵan.
Aıta keteıik, Qashaǵan iri munaı jobasyna qatysty 2,3 trln teńge (5,1 mlrd dollar shamasynda) kólemindegi talapty QR Ekologııa jáne tabıǵı resýrstar mınıstrligi 2023 jyly kúkirtti shamadan tys saqtaý faktileri boıynsha engizgen edi.
Alaıda 2025 jylǵy 1 tamyzda Astana sotynyń ákimshilik ister jónindegi sot alqasy vedomstvo bergen nusqamany ony shyǵarý kezinde jiberilgen protsessýaldyq buzýshylyqtarǵa baılanysty joıǵan.
Byltyr tamyzda Ekologııa mınıstrligi sot kórsetken eskertýlerdi joıyp, kompanııaǵa ekologııalyq talaptardy buzǵany úshin 2,3 trln teńge kóleminde aıyppul saldy.
Aıta keteıik, Qashaǵanda jylyna 2,5 mlrd tekshe metr gaz óńdeıtin zaýyttyń qurylysy bastaldy.
Sonymen qatar Qazaqstanda «ekinshi Qashaǵan» paıda bolýy múmkin. QMG jobanyń egjeı-tegjeıin aıtqan edi.
