Qashaǵan operatory ÓBK týraly suraqqa jaýap berdi

ASTANA. KAZINFORM – «Nort Kaspıan Opereıtıng Kompanı N.V.» JShS (NCOC) basqarýshy dırektory Djankarlo Rýıý Ónimdi bólý týraly kelisimdi (ÓBK) Qazaqstan úshin tıimdi sharttarmen uzartý máselesine qatysty suraqqa jaýap berdi.

Búgin Májilistiń Ekologııa máseleleri jáne tabıǵat paıdalaný komıteti Soltústik Kaspıı (Qashaǵan) jobasy boıynsha elishilik qundylyqty damytý jáne otandyq óndirýshilerdi qoldaý máselesin qarady. Onda depýtat Baqytjan Bazarbek Djankarlo Rýıýǵa ÓBK týraly suraq qoıdy.

− Siz Úkimetpen ÓBK sharttaryn ózgertý týraly kelissózder júrgizýge daıynsyz ba? Ásirese, qazir jańa Salyq kodeksi qarastyrylyp jatyr, al Prezıdent ÓBK sharttaryn qaıta qaraýdy, sonyń ishinde Qazaqstanǵa tólenetin tólemderdi kóbeıtý týraly aıtqan edi, − dep surady depýtat.

Óz jaýabynda Djankarlo Rýıý NCOC operatory ÓBK-ni talqylaý men oǵan qol qoıýǵa qatyspaıtynyn, óıtkeni bul másele aktsıonerler men memlekettiń quzyretine kiretinin aıtty.

− Men bul suraqtan qashqym kelmeıdi, biraq NCOC ÓBK bóligi bolyp sanalmaıdy. Sebebi ol – aktsıonerler men memleket arasynda jasalǵan kelisim. Sondyqtan bul suraqqa jaýap bere almaımyn. Zańdy turǵyda biz aktsıonerler men Úkimet arasyndaǵy kelissózderge qatyspaımyz, − dedi ol.

Óz kezeginde Baqytjan Bazarbek kompanııa basshylyǵy bul máselege túsinikteme berýi keregin aıtyp, jazbasha saýal joldaıtynyn aıtty.

− Siz NCOC atynan kelip otyrsyz, siz − NCOC basshysysyz. Bul suraqqa jaýap alý úshin aktsıonerlerdi shaqyrýdyń qajeti joq. Memlekettik organdar aldynda siz NCOC-tyń resmı ókilisiz, Parlament Májilisine NCOC basshysy retinde shaqyrdyq. Sondyqtan bul suraqqa jaýap berýge quzyretińiz bar. Osyny nazarda ustańyz. Men sizge resmı túrde jazbasha saýal joldaımyn, − dedi depýtat.

Buǵan deıin Djankarlo Rýıý Qashaǵan ken ornyndaǵy kompanııa jumysy týraly aıtyp bergen edi.

Sondaı-aq, iri munaı-gaz jobalarynda otandyq taýarlar men qyzmetterge basymdyq beriledi.