Qashaǵan operatorynyń NCOC kompanııasynan 2,3 trln óndirip alý isi qaıta jandandy
ATYRAÝ. KAZINFORM – Qashaǵan operatorynyń NCOC kompanııasyna salynǵan 2,3 trln teńge kólemindegi aıyppuldy óndirý isi jandandy. Mundaı aqparat atqarýshylyq is júrgizý organdarynyń avtomattandyrylǵan aqparattyq júıesinde belgili boldy.
Arnaıy júıedegi málimetke súıensek, atqarýshylyq is boıynsha bereshekti óndirý 29 qyrkúıek kúni qaıta bastalǵan. Atqarýshylyq is 21 shilde kúni qozǵalǵan edi. Keıin 7 qyrkúıekte ýaqytsha toqtatyldy.
Ádilet mınıstrligi qomaqty qarjyny óndirý protsesin toqtaýyn NCOC kompanııasy memlekettik sot oryndaýshysynyń áreketterine shaǵymdanýyna baılanysty Atyraý oblysynyń mamandandyrylǵan aýdanaralyq ákimshilik soty atqarýshylyq is júrgizý materıaldaryn suratýymen túsindirdi.
Jýyqta Atyraý oblysynyń mamandandyrylǵan aýdanaralyq ákimshilik soty Qashaǵan ken ornynyń operatory NCOC kompanııasynyń 2,3 trln teńge kólemindegi aıyppuldy óndirip alýǵa qatysty atqarýshylyq is júrgizýdi toqtatý týraly talabyn qanaǵattandyrmady. Naqtyraq aıtqanda, kompanııa memlekettik sot oryndaýshysynyń 21 shildede atqarýshylyq is júrgizýdi qozǵaý týraly shyǵarǵan qaýlysyn, 21 shildede jyljymaıtyn múlikke jáne 22 shildede kólik quraldaryna tyıym salý týraly qaýlylaryn, sondaı-aq 2026 jylǵy 23 jáne 30 shildede belgili bir áreketterdi jasaýǵa engizilgen tyıymdardy zańsyz dep tanýdy jáne kúshin joıýdy suraǵan edi. Alaıda sot NCOC-diń barlyq talabyn qanaǵattandyrýdan bas tartty.
Eske sala keteıik, Qashaǵan iri munaı jobasyna qatysty 2,3 trln teńge (5,1 mlrd dollar shamasynda) kólemindegi talapty QR Ekologııa jáne tabıǵı resýrstar mınıstrligi 2023 jyly kúkirtti shamadan tys saqtaý faktileri boıynsha engizgen edi.
Kompanııa aıyppulmen kelispeıtinin málimdep, halyqaralyq tórelik rásimderge júginse, Qazaqstan tarapy sot sheshimi zańdy kúshine engenin jáne ony oryndaý mindetti ekenin atap ótti.
