Qashaǵan munaıy úsh baǵyt boıynsha eksportqa jiberiledi
ATYRAÝ. QazAqparat - Atyraý obysyndaǵy Qashaǵan teńiz ken ornynan alynǵan munaı eksportqa úsh qubyr jelisi arqyly tasymaldanatyn bolady, dep habarlaıdy «QazAqparat» HAA tilshisi.
«Árbir merdiger kompanııa - jobanyń aktsıoneri, baǵyt marshrýty men satý ornyn ózi tańdaıdy. Ázirge Qashaǵan munaıy Kaspıı Qubyr konsortsıýmy jáne «QazTransOıl» arqyly tasymaldanýda. Munaı óndirýdegi Qazaqstan Respýblıkasynyń úlesi Kaspıı Qubyr konsortsıýmy júıesi boıynsha tasymaldanýda. Munaı eksportynyń áleýetti baǵdarlary batysqa qaraı «Atyraý - Novorossıısk» (KQK arqyly) qubyr jelisimen, soltústik baǵytqa «Atyraý - Samara» ( «Transneft» reseılik júıesine ený arqyly) qubyr jelisi jáne shyǵysqa qaraı «Atyraý - Alashankoý» qubyr jelisi arqyly jiberiledi. «Ár aktsıoner óz úlesteriniń tasymaldanýyna jáne esep berý, ónimdi bólisý týraly kelisimge sáıkes QR Úkimetimen ónimdi bólisýge derbes jaýap beredi», - dep habarlady QR Energetıka mınıstrligi.
Qashaǵan ken ornynan munaı óndirý isi 2016 jyldyń qyrkúıek aıynda qaıta jandandy. 2017 jyldyń 13 qańtary kúni Kaspıı teńiziniń qazaqstandyq bóliginde munaı men gaz óndirý boıynsha alǵashqy jobanyń operatory Nort Kaspıan Opereıtıng Kompanı N.V. jarııalaǵandaı, 8 qańtar kúni Qashaǵan keninde qaýipsiz óndiris pen eksport kólemi 1 mıllıon shıki munaı jáne kondensatty qurady. Ken óndirý 2016 jyldyń qyrkúıek aıynda bastalyp, qazirgi tańda onyń qarqyny táýligine 180 000 barrel munaıǵa jetti. Іlespe gazdy (kúkirt) qaıta aıdaý men ońtaılandyrýdy bastaǵannan keıin alǵashqy qashaǵandyq jobanyń kezeńi aıasynda óndiris deńgeıin táýligine 370 000 barrelge jetkizý josparlanǵan.
