Qashaǵan men Teńizden óndiriletin munaıdyń 1 barreliniń quny qupııa — mınıstrlik
Qashaǵan men Teńiz ken ornynan óndiriletin munaı quny qupııa málimet sanalady. Bul týraly Energetıka mınıstrliginen málim etti, dep habarlaıdy Kazinform.
«1997 jylǵy 18 qarashadaǵy Soltústik Kaspıı boıynsha ónimdi bólisý týraly kelisim erejelerine sáıkes, Qashaǵan ken oryndarynda óndiriletin munaıdyń 1 barreliniń qunyna qatysty aqparat qupııa málimetke jatady. Bul aqparatty ashý barlyq taraptyń jazbasha kelisimimen ǵana múmkin bolady. «Teńizshevroıl» JShS-niń ishki saıasatyna sáıkes te aqparat qupııa sanalady», - dep atap ótti mınıstrlik agenttiktiń resmı saýalyna oraı.
Aıta keteıik, ótken jyly el bıýdjetine Teńiz ken ornynan 2 trln 841 mlrd 762 mln, Qashaǵannan 196 mlrd 056 mln teńge salyq tústi. Jalpy, sońǵy 10 jyldyń ishinde Tengizchevroil bıýdjetke 19 trln 958 mlrd 719 mln, NCOC 982 mlrd 101 mln teńge salyq aýdardy.
