Qashaǵan kenishiniń bazasynda 2 gaz óńdeıtin zaýyt ashylady

ASTANA. QazAqparat – QR Energetıka mınıstri Bolat Aqsholaqov Úkimet otyrysynda gaz óndiriý kólemi qalaı artatynyn baıandady, dep habarlaıdy QazAqparat tilshisi.

«Memleket basshysy 2029 jylǵa qaraı taýarlyq gaz óndirisiniń kólemin 30 mlrd tekshe metrge deıin jetkizý mindetin qoıdy.

Qashaǵan ken ornynda qýaty 1,1 mlrd tekshe metr jáne 2 mlrd tekshe metr ilespe gaz óńdeıtin 2 zaýyt iske qosylady.

2023 jyly «Jaıyqmunaı» gaz óńdeý zaýytynda Qarashyǵanaq gazyn óńdeý boıynsha sheshim qabyldanady. Bul gaz óńdeýdi 4 mlrd tekshe metrge ulǵaıtýǵa múmkindik beredi», - dedi mınıstr.

Onyń aıtýynsha, 2029 jylǵa qaraı Shymkent munaı óńdeý zaýytynyń qýaty 9 mln tonnaǵa deıin artýǵa tıis.

«Bul qaıta óńdeý kólemin jylyna 21 mln tonnaǵa jetkizýge múmkindik beredi. Eksport baǵyttaryn ártaraptandyrý jónindegi tapsyrma sheńberinde munaı eksportynyń balamaly baǵyttaryn damytý jónindegi jol kartasynyń jobasy ázirlendi.

Osylaısha, Ázerbaıjan, Grýzııa jáne Túrkııa porttary baǵytynda Transkaspıı halyqaralyq kólik baǵytyn damytýǵa, sondaı-aq Qytaı Halyq Respýblıkasy men Iranǵa eksporttyq baǵyttarǵa basa nazar aýdarylady», - dedi Bolat Aqsholaqov.