Qashaǵan ken ornyndaǵy óndiristik nysandar jumysy 45 kúnge toqtady

ATYRAÝ. QazAqparat – Kaspıı teńiziniń qazaqstandyq sektoryndaǵy «Qashaǵan» ken ornyndaǵy óndiristik nysandar jumysy 45 kúnge toqtady, dep habarlaıdy QazAqparat tilshisi.

NCOC kompanııasynyń baspasóz qyzmetinen málim etkendeı, búgin 1 maýsymnan bastap «Qashaǵan» ken ornynyń teńiz jáne qurlyq keshenderindegi óndiristik nysandary jumysyn toqtatady.

«Josparly aldyn alý maqsatyndaǵy jóndeý – mańyzdy is-sharalardyń biri. Sol sebepten, birneshe jylda bir ret normatıvtik talaptarǵa jáne óndiristik qajettilikterge sáıkes jóndeý jumystaryn júrgizý úshin óndiristi qysqa kezeńge tolyq toqtatý kózdelgen. Maqsat – «Qashaǵan» ken orny óndiristik nysandarynyń josparly aldyn alý maqsatyndaǵy jóndeý-óndirý júıesiniń tutastyǵy men qaýipsizdigin qamtamasyz etý jónindegi sharalardyń, QR normatıvtik quqyqtyq aktilerimen belgilengen mindetti is-sharalar men ınspektsııalardyń júzege asyrylýyn, sonymen qatar ónimdilikti jáne óndirý júıesiniń senimdiligin ońtaılandyrý men odan ári arttyrýǵa arnalǵan birqatar jumystar men jobalardyń oryndalýyn qamtamasyz etý. Kólemi 2 mln adam-saǵattan asatyn aýqymdy jumystardy 45 kún ishinde oryndaý josparlanyp otyr», - dep habarlady kompanııanyń baspasóz qyzmeti.

«Qashaǵan» – Kaspıı teńiziniń qazaqstandyq sektorynda munaı óndiriletin alǵashqy eń iri ken orny. 2000 jyly ashylǵan. Munda óndiriletin munaı qory – boljam boıynsha 9-13 mlrd barrel. «Qashaǵanda» kommertsııalyq munaı óndirý 2016 jylǵy kúzde bastalǵan.