Qashaǵan ken ornynda munaı óndirý kólemi azaıdy

ATYRAÝ. QazAqparat – Kaspıı teńiziniń qazaqstandyq sektoryndaǵy «Qashaǵan» ken ornynyń eki uńǵymasynda kúkirtsýtek gazy shoǵyrlanǵan. Sol sebepti, bul uńǵymalardan munaı óndirý kólemi tómendegen, dep habarlaıdy QazAqparat tilshisi.

Bul derekti NCOC kompanııasynyń baspasóz qyzmeti rastady.

«Soltústik Kaspıı jobasynyń operatory – NCOC kompanııasy «Qashaǵan» ken ornynyń teńiz keshenindegi eki aıdaý uńǵymasynyń «A» oqpanaralyq keńistigindegi flıýıdtiń synamasyn ádettegideı alý kezinde gazdyń (H2S) shoǵyrlanǵany baıqalǵanyn rastaıdy. Bul oraıda, osy uńǵymalardy paıdalaný kezinde qalypty jumys rejıminen birde-bir aýytqý jaǵdaıy baıqalmady. Kompanııa qaýipsizdik pen aktıvterdiń bútindigine basa nazar aýdarady. Sondaı-aq, qaýipsizdikke nemese qorshaǵan ortaǵa nuqsan kelmeýin qamtamasyz etedi», - dep habarlady kompanııanyń baspasóz qyzmeti.

Belgili bolǵandaı, 20 mamyrda NCOC eki uńǵymanyń bútindigin tekserý úshin japqan. Sol kezde qosymsha zertteý baǵdarlamasy sheńberindegi jumystar oryndalǵan.

«Tekserý jumysy kezinde uńǵymaǵa keri aıdalatyn gazdyń kólemi azaıtyldy. Sáıkesinshe, óndirilgen munaıdyń da kólemi tómendedi», - dep málim etti kompanııanyń baspasóz qyzmetinen.

«Qashaǵan» – Kaspıı teńiziniń qazaqstandyq sektorynda munaı óndiriletin alǵashqy eń iri ken orny. 2000 jyly ashylǵan. Munda óndiriletin munaı qory – boljam boıynsha 9-13 mlrd barrel. «Qashaǵanda» kommertsııalyq munaı óndirý 2016 jylǵy kúzde bastalǵan.

Eske sala ketelik, budan buryn Qashaǵan ken ornyndaǵy óndiristik nysandar jumysy 45 kúnge toqtaǵanyn habarlaǵan bolatynbyz.