Qashaǵan ken ornynda salynyp jatqan gaz óńdeý zaýyty kógildir otyn baǵasyna áser ete almaıdy
Qashaǵan ken ornynda salynyp jatqan gaz óńdeý zaýyty ishki naryqty kógildir otynmen tolyq qamtamasyz ete almaıdy. Bul jaıynda Energetıka mınıstrliginen málim etti, dep habarlaıdy Kazinform.
«Qashaǵan ken ornynda gaz óńdeý zaýyty «QazaqGaz» UK» AQ kúshimen salynyp jatyr. Paıdalanýǵa berý merzimi – 2025 jyl. Qazirgi tańda qurylys-montajdaý jumystary qarqyndy túrde júrip jatyr. Zaýyt iske qosylǵannan keıin ishki naryqtyń qajettilikteri úshin shamamen 720 mln tekshe metr taýarlyq gaz óndiriledi dep boljanady. Bul ishki naryqtyń qajettilikterin ishinara jabýǵa múmkindik beredi», - dep atap ótti mınıstrlikten agenttiktiń resmı saýalyna oraı.
Vedomstvo málimetinshe, atalǵan zaýytta óndiriletin taýarlyq gaz ishki naryqtaǵy gaz baǵasyna aıtarlyqtaı áser ete qoımaıdy.
«Óıtkeni «QazaqGaz» UK» AQ shıki gazdy Qashaǵan ken ornynyń operatorynan aqysyz negizde alady jáne taýarlyq gazdyń sońǵy baǵasynda tek zaýyttyń óńdeý tarıfi ǵana qoldanylatyn bolady», - dep túsindiredi mınıstrlikten.
