Qashaǵan, Qarashyǵanaq, Teńiz elimizdiń batys óńirlerine jylyna qansha qarjy bóledi

ASTANA. QazAqparat - 2024 jylǵa qaraı Qashaǵanda jylyna 16 mıllıon tonna munaı óndiriletin bolady. Bul týraly búgin elordada halyqqa esep berý kezdesýi barysynda QR Energetıka mınıstri Qanat Bozymbaev aıtty, dep habarlaıdy QazAqparat tilshisi.

«Qashaǵanda 2024 jylǵa qaraı budan ári keńeıtý jobasy boıynsha óndiris kólemin jylyna 13 mln tonnadan 16 mıllıonǵa jetkizý kútilýde. Jobany iske asyrý kezeńinen bastap Atyraý jáne Mańǵystaý oblystarynyń áleýmettik jáne ınfraqurylymdyq damýyna quıylǵan ınvestıtsııa kólemi 570 mln AQSh dollaryn qurady. Jalpy, áleýmettik-ınfraqurylymdyq damýǵa jyl saıyn 50 mln AQSh dollary bólinýde»,- dedi Qanat Bozymbaev.

Onyń aıtýynsha, Qarashyǵanaqtaǵy bolashaq ıgerý josparyna sáıkes, aǵymdaǵy óndirý kólemin saqtap qalý boıynsha jobalardy iske asyrý kózdelgen. Olar - gaz qýattaryn jańǵyrtý, 4-shi kompressordy jáne 5-shi ishki kásipshilik qubyryn salý. Іske asyrý merzimi 2020 jyl, ınvestıtsııa kólemi 1,5 mlrd AQSh dollary.

«Qarashyǵanaqty ıgerý jyldarynda Batys Qazaqstan oblysynyń áleýmettik jáne ınfraqurylymdyq damýyna shamamen 342 mln AQSh dollar bólindi. Jalpy, óńirdiń áleýmettik-ınfraqurylymdyq damýyna jyl saıyn 20 mln AQSh dollary bólinýde», - dedi ol.

Mınıstrdiń dereginshe, Teńizde 30 myńnan astam qazaqstandyqtar jumys isteıdi. Joba boıynsha ınvestıtsııa kólemi 38 mıllıard AQSh dollaryn qurady, 2 jyl ishindegi naqty ıgerý - 11 mlrd dollardan astam, al 2018 jylǵy jospar 7 mıllıard dollardan asady.

«2022 jyldan keıin Teńizdegi munaı óndirý kólemi 26-dan 39 mıllıonǵa deıin artatyn bolady. 1993 jyldan bastap Teńizshevroılmen Atyraý oblysynyń turǵyndary úshin áleýmettik jobalarǵa 1,5 mlrd AQSh dollary berildi. Jalpy, Atyraý oblysynyń áleýmettik-ınfraqurylymdyq damýyna jyl saıyn shamamen 25 mln AQSh dollary bólinýde», - dedi Qanat Bozymbaev.