Qashaǵan, Qarashyǵanaq, Teńiz jobalary: operatorlarǵa jergilikti qamtýdy arttyrý mindetteldi
ASTANA. KAZINFORM – Energetıka mınıstrligi Teńiz, Qashaǵan jáne Qarashyǵanaq jobalarynyń operatorlaryna otandyq óndirýshilerdi tartýǵa baǵyttalǵan naqty strategııalyq mindetter júktedi.
Energetıka mınıstrligi jergilikti qamtýdy damytý saıasatynyń jańa, aıtarlyqtaı talapshyl kezeńine kóshetinin málimdedi.
Energetıka mınıstri Erlan Aqkenjenovtyń tóraǵalyǵymen ótken Halyqaralyq munaı-gaz mashına jasaý salasyn damytý ortalyǵy (IMBC) qaýymdastyǵy keńesiniń otyrysynda iri munaı-gaz operatorlary — «Teńizshevroıl», «Nort Kaspıan Opereıtıng Kompanı» jáne «Qarashyǵanaq Petroleým Opereıtıngtiń» satyp alý praktıkasyn túbegeıli ózgertýge baǵyttalǵan naqty is-sharalar kesheni usynyldy.
Ekonomıkany ártaraptandyrý boıynsha strategııalyq maqsattarǵa qol jetkizý úshin jumystyń qarqynyn edáýir jedeldetý de tapsyryldy. Mınıstr buǵan deıingi kelisimder men Parlament Májilisindegi tyńdaýlar qorytyndysy boıynsha berilgen tapsyrmalardyń naqty oryndalýyn qamtamasyz etý úshin bar kúsh-jigerdi salý kerek ekenin de basa aıtty.
— Biz seriktesterimizdiń Qazaqstan ekonomıkasyna qosqan úlesin joǵary baǵalaımyz. Sonymen qatar jańa mindetterdi oryndaý úshin áleýetimizdiń jetetinin kórip otyrmyz. Bizdiń tujyrymdamalyq maqsatymyz — iri jobalardyń aınalasynda ózin-ózi qamtamasyz etetin ónerkásiptik klaster qalyptastyrý. Bul búginde ulttyq ekonomıkanyń turaqtylyǵyna tikeleı áser etetin másele, — dedi Energetıka mınıstri Erlan Aqkenjenov.
Osyǵan oraı, operatorlarǵa naqty mindetter qoıyldy. 2025 jyldyń qyrgúıek aıynda Aqtaý qalasynda ótetin Munaı-gaz mashına jasaý forýmy aıasynda otandyq jetkizýshilermen birqatar kelisimsharttarǵa qol qoıý josparlanǵan. Sonymen qatar árbir operatordyń keminde bes uzaqmerzimdi kelisimsharty otandyq óndirýshilermen jasalýy kerek.
Sondaı-aq halyqaralyq OEM-óndirýshileriniń óndirisin elimizde jergiliktendirý boıynsha jumysty jalǵastyrý qajet. Bul úshin barlyq qoljetimdi tetik, sonyń ishinde «ınvestıtsııalyq aıyrbas sharty» syndy quraldar qoldanylýy tıis.
Bul bastamalar IMBC-tiń 109 myńnan astam taýar pozıtsııasy boıynsha júrgizgen analıtıkalyq taldaýyna jáne 200-den astam jergilikti kásiporyndy qamtyǵan aýdıttiń nátıjelerine sáıkes júrgiziledi. Naqty sharalardyń oryndalýy Energetıka mınıstriniń tikeleı baqylaýynda bolady. Munan bólek, operatorlar men Qazaqstan Úkimeti arasyndaǵy ózara baılanystyń tıimdiligin baǵalaýda negizgi kórsetkishterdiń biri retinde qaralady.
Aıta ketelik Energetıka mınıstrligi kómir ónerkásibiniń máselelerin jedel basqarýǵa kiriskeni týraly jazǵan edik.